.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 95
Hüküm no: 91
Orijinal metin no: [19a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Asyetor v. Yorgi’nin Mesko v. Apostol ile Dimo v. Tıranoz’a evini bey‘ bi’l-vefâ yoluyla satışı

Vilâyet-i Rumeli’nde Yenişehir kazâsı aktâ‘ından olan Kûhistan nâhiyesine tâbi‘ Ayodiya nâm karye zimmîlerinden Asyetor v. Yorgi nâm zimmî meclis-i şer‘de bâ‘isü’r-rakīm Mesko v. Apostol ve Dimo v. Tıranoz nâm zimmîler muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Acemoğlu Yani v. Koli mülkü ve bir tarafı Yorgi v. Beldenmi mülkü ve bir tarafı Papa Dimo mülkü ve bir tarafı ba‘zan Sarı Tonos ve ba‘zan tarîk-i âm ile mahdûd iki bâb fevkānî oda ve altında ahırı müştemil menzilimi cümle tevâbi‘ ve levâhıkı ile yine karye-i mezbûre sınırı dâhilinde Merkâse nâm mevzi‘de bir tarafı Aleksi bağı ve bir tarafı Papa Angela bağı ve tarafeyni tarcûde? ile mahdûd bir kıt‘a mülk bağımı dahi âmme-i menâfi‘ ve merâfıkı ile merkūmân Mesko ve Dimo’ya yüz elli kıt‘a esedî guruşa târih-i kitâbdan dört sene tamâmına değin edâ etmek üzre bi tarîki’l-bey‘ bi’l-vefâ bey‘ eylediğimde merkūmân dahi tarîk-i mezbûr üzre iştirâ ve kabûl eylediler eğer târih-i mezbûr tamâmına değin yüz elli esedîyi merkūmâna edâ ve teslîm eylemezsem bey‘-i bâta munkalib olsun dedikde gıbbe’t-tasdîk mâ vaka‘a kayd şud. Fî 7 Şevvâl sene [10]81.


Şuhûdü’l-hâl: Mehmed b. Eyüb, Mehmed b. Abdullah, Eyüb Çelebi b. ( ), Mehmed b. Mahmud, Yani v. İstoryani, Dimo v. Sefer, Zahari v. Yorgaki, Dimo v. İde, Dimo v. Niha, İsterye v. Apostol, Aleksandra v. Dimo, Dimo v. Andriye.