|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 99 Hüküm no: 98 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hüseyin Çavuş Vakfı’na ait murâbaha gelirinin ödenmesi
Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de merhûm Hüseyin Çavuş evkāfına bâ-berât-ı şerîf-i âlîşân bi’l-fi‘l mütevellî olan bâ‘isü’l-kitâb Halil Çelebi b. Hüdâverdi mahfil-i kazâda sâbıkan evkāf-ı mezbûre mütevellîsi olan Davud Efendi b. Mehmed mahzarında takrîr-i kelâm ve bast-ı merâm edip târih-i kitâbdan dört sene mukaddem merkūm Davud Efendi tevliyyet-i mezbûreden azl ve yerine ben mütevellî olduğumda mezbûr Davud Efendi mâl-ı vakf-ı mezbûru yerli yerinde bana gösterip burhânlarını teslîm eylediğinde işbu hâzır bi’l-meclis Mustafa Çelebi b. Hüdâverdi zimmetinde asl-ı mâl-ı vakf-ı mezbûrdan yüz guruş vardır deyû gösterip ol dahi gerçi zimmetimde yüz guruş vardır lâkin devr-i şer‘î ve ilzâm-ı ribh olunmamıştır deyû dört senedir ki ribh nâmına bir akçe ve bir habbe alınmamıştır, hâlâ suâl olunup takrîrleri tahrîr olunmak matlûbumdur deyicek gıbbe’s-suâl merkūm Mustafa cevâbında fi’l-vâki‘ merkūm Davud Efendi’den dört sene mukaddem yüz guruş istikrâz ve kabz eylemişdim hâlâ yüz guruşu teslîm ederim ve lâkin benim üzerime devir ve ilzâm-ı ribh olmamağın ribh nâmına bir akçe ve bir habbe vermedim ve vermem deyicek mezbûr Davud Efendi dahi mâl-ı vakf-ı mezkûru merkūm Mustafa üzerine hîn-i teslîmde ba‘dehû devr-i şer‘î ve ilzâm-ı ribh eyledim deyû ikrâr edicek alâ mûcebi ikrârihimâ mezkûrân Mustafa Çelebi ve Davud Efendi’den bir kıyye? murâbaha lâzım gelmeğin mâ vaka‘a bi’t-taleb ketb olundu. Fî 11 min şehri Şevvâli’l-mükerrem sene ihdâ ve semânîn ve elf.
Şuhûdü’l-hâl: Mustafa Çelebi b. Pervâne, Hüseyin Çelebi b. İsa, Mehmed Bey b. el-mühtedî, Ali Çelebi b. Hızır, Mustafa Çelebi b. Mehmed Berberzâde, Mehmed b. Mahmud ve gayruhüm mine’l-hâzırîn.
|