|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 99 Hüküm no: 97 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hüseyin b. Şaban’ın Mustafa b. Ali’ye ev satışı
Vilâyet-i Anadolu’da Eğin kasabası mahallâtından Alican mahallesi sâkinlerinden Hüseyin Bey b. Şaban nâm kimesne meclis-i şer‘de râfi‘ü’l-kitâb Mustafa b. Ali mahzarında ikrâr ve i‘tirâf edip akd-i âti’z-zikrin sudûruna değin silk-i mülkümde münselik emlâkimden mahalle-i mezbûrede vâki‘ bir tarafı Mehmed Bey mülkü ve bir tarafı diğer Mehmed Bey mülkü ve bir tarafı müşterî-i mezbûrun mülkü ve taraf-ı âharı tarîk-i âm ile mahdûd bir bâb fevkānî ve bir bâb tahtânî odaları müştemil mülk menzilimi cümle tevâbi‘iyle mezbûr Mustafa’ya tarafeynden îcâb ve kabûlü hâvî bey‘-i bâtt-ı şer‘î ile on sekiz guruşa bey‘ ol dahi ber minvâl-i muharrer iştirâ ve kabûl eyledikden sonra semeni olan mezbûrü’l-vasf on sekiz kıt‘a esedî guruşu mezbûrun yedinden tamâmen ahz u kabz eylediğimden sonra menzil-i mahdûd-ı mezkûru mahallinde zabt ve tasarrufa mezbûr Mustafa’yı tarafımdan taslît eyledim ba‘de’l-yevm alâka ve medhalim yoktur mezbûr Mustafa’nın mülk-i müşterâsıdır Keyfe mâ yeşâ’ ve yahtâr mutasarrıf olsun dedikde mâ hüve’l-vâki‘ kayd şud. Fî 10 min Şevvâl sene [10]81.
Şuhûdü’l-hâl: Hüseyin Beşe b. Maksud, Muhzır Mehmed, Ali Beşe b. er-Râcil, Ali Bey b. ( ), Mehmed [b.] Abdullah, Mustafa b. Mehmed ve gayruhüm mine’l-hâzırîn.
|