.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 101
Hüküm no: 100
Orijinal metin no: [20b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. Hüseyin’in eşi Mustafa b. Muharrem ile boşanma davası

Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Evlice Baba mahallesi sâkinelerinden Hatice bt. Hüseyin nâm hâtun meclis-i şer‘de zevci işbu sâhibü’l-kitâb Mustafa b. Muharrem mahzarında ikrâr-ı tâm ve takrîr-i kelâm edip zevcim mezbûr Mustafa ile hüsn-i zindegânîmiz olmayıp beynimizde şikāk ve adem-i vifâk olmağla emr-i mu‘âdât-ı mütemâdiye olmağın zimmetinde mütekarrir ve ma‘kūdun-aleyh dört bin akçe mehr-i müeccelimden ve nafaka-i iddet-i mu‘âyenem ve me’ûnet-i süknâmdan fâriğa olduğumdan mâ‘adâ bin fıddî nakd-i râyic fi’l-vakt akçe ve bir mükemmel hamam rahtı ve bir mor çuka ferâce ve bir arakiye ve bir sedefkârî âyine bedel-i hul‘ olmak üzre zevcim merkūm Mustafa yedinde def‘ ve teslîm ve muhâla‘a-i sahîha-i şer‘iyye ile muhâla‘a eyleyip birbirimizin zimmetini zevciyyete müte‘allik âmme-i de‘âvî ve mütâlebâtdan ibrâ ve iskāt eyledik deyicek merkūm Mustafa meclis-i mezbûrda ben dahi zikr olunan bedel-i hul‘ı zevcem merkūme Hatice yedinden tamâmen alıp kabz edip minvâl-i muharrer üzre olan hul‘ı kabûl ve mezbûrenin zimmetini zevciyyete müte‘allik da‘vânın küllîsinden ibrâ eyledim deyû mezbûreyi kelimât-ı muharreresinden vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’s-sânî aşer min Şevvâli’l-mükerrem sene ihdâ ve semânîn ve elf.


Şuhûdü’l-hâl: Mehmed Efendi b. Murad el-İmâm, Mehmed b. Ahmed, Abdullah b. Abdullah el-Müezzin, Abdi Beşe b. Mehmed er-Râcil, Veli Çelebi b. Murtaza el-Attâr, Eyüb Çelebi b. Hasan, Mustafa Çelebi b. Mehmed, Hasan b. Mehmed, Ali Bey. b. Ahmed, Nasuh b. Mehmed, Hüseyin b. Murad, Kâtibü’l-hurûf Eyüb Çelebi, Mehmed b. Mahmud ve gayruhüm.