.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 101
Hüküm no: 101
Orijinal metin no: [20b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yava olan iki baş karasığır öküzün asıl sahibine teslimi

Husûs-ı âti’l-beyânı mahallinde istimâ‘ için bi’t-taleb mahkeme-i şerîfeden umdetü’l-müderrisîn Mustafa Efendi irsâl olunup ol dahi zeyl-i kitâbda muharrerü’l-esâmî müslimîn ile Havâss-ı Aliyye kazâsına tâbi‘ Müderris nâm karyeye varıp Şaban Kethüdâ b. Mahmud’un menzilinde akd-i meclis-i şer‘ olundukda işbu sâhibü’l-kitâb es-Seyyid Mustafa Çelebi b. es-Seyyid Ahmed mezbûr Şaban Kethüdâ mahzarında üzerine da‘vâ ve takrîr-i kelâm edip târih-i kitâbdan bir ay mukaddem iki re’s kara sığır öküzlerim mülkümden zâyi‘ olmuşdu. Hâlâ zikr olunan iki kara sığır öküzlerimi mezbûr Şaban yedinde buldum suâl olunup bana teslîme tenbîh olunması murâdımdır dedikde gıbbe’s-suâl mezbûr Şaban cevâbında zikr olunan öküzleri yava olmak üzre ahzını ikrâr ve lâkin müdde‘î-i mezbûrun mülkü olduğunu inkâr ve mülkünden zâyi‘ olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Ali Bey b. Abdullah ve diğer Ali Beşe b. Osman nâm kimesneler li ecli’ş-şehâde meclis-i ma‘kūd-ı mezkûrda hâzırân olup istişhâd olunduklarında işbu hâzır fi’l-meclis iki re’s kara sığır öküzler müdde‘î-i mezbûrun mülkü olup târih-i kitâbdan bir ay mukaddem mülkünden zâyi‘ eyledi biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra müdde‘î-i mezbûr es-Seyyid Mustafa Çelebi’ye zikr olunan öküzler âhara bey‘ veyâ hibe ve bir tarîkle mülkünden ihrâc etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ ettikten sonra zikr olunan iki re’s kara sığır öküzü müdde‘î-i mezbûr es-Seyyid Mustafa’ya teslîme mezbûr Şaban’a tenbîh birle mevlânâ-yı mezbûr mahallinde tahrîr ba‘dehû inhâ ve takrîr etmeğin kayd şud. Fî 12 min Şevvâl sene [10]81.


Şuhûdü’l-hâl: Hüseyin b. Abdullah, Ali b. Ömer, Mehmed b. Eyüb, Mehmed b. Mahmud, Hasan b. Abdullah ve gayruhüm.