Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 324 Hüküm no: 367 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Beşe b. İbrahim’in, Mustafa Beşe b. Muharrem’den alacaklı olduğu Tüccâr tâifesinden Musa Beşe b. İbrahim nâm kimesne meclis-i şer‘-i şerîf-i lâzımü’t-teşrîfde işbu bâ‘isü’l-kitâb Mustafa Beşe b. Muharrem nâm kimesne mahzarında üzerine da‘vâ ve takrîr-i kelâm edip mezbûr Mustafa Beşe zimmetinde cihet-i deyn-i şer‘îden on beş esedî guruş hakkım olup bundan akdem meblağ-ı mezbûrun beş esedî guruş ve bir sümün guruşa mezbûr Mustafa Beşe yedinden ahz u kabz edip bâkī dokuz esedî guruş ve dokuz sümün zimmetinde kalmışdır suâl olunup alıverilmesi matlûbumdur dedikde gıbbe’s-suâl mezbûr Mustafa Beşe cevâbında fi’l-vâki‘ vech-i mübeyyen üzre müdde‘î-i mezbûr Musa Beşe’ye cihet-i mezbûreden bâkī dokuz esedî ve dokuz sümün guruş vâcibü’l-edâ ve lâzımü’l-kazâ deynim vardır deyû bi tav‘ihî ikrâr ve i‘tirâf etmeğin alâ mûcebi ikrârihî meblağ-ı bâkī-i mezbûr dokuz esedî ve dokuz sümün guruşu müdde‘i-i mezbûr Musa Beşe’ye edâ ve teslîme merkūm Mustafa Beşe’ye tenbîh birle mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Şaban Ağa b. Süleyman, Şükrullah Bey b. Mustafa, Abdi Çelebi b. Hüseyin, Baba Resul b. Rıdvan ve gayruhüm mine’l-hâzırîn.