Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 323 Hüküm no: 366 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Beşe b. Hüseyin’in kaçan ve sonra yakalanan kölesini gözetimi altındayken alıp salıveren Bostancı Mustafa’dan kölenin ücretinin tazmini Vilâyet-i Rumeli’nde kasaba-i Malkara ahâlîsinden bâ‘isü’l-kitâb Pîr Mehmed Beşe b. Hüseyin nâm kimesne meclis-i şer‘-i şerîfde Hadâyik-i sultânîden Davudpaşa bahçesi bostancılarından Mustafa b. Sâlih nâm kimesne mahzarında üzerine da‘vâ ve takrîr-i kelâm edip orta boylu, elâ gözlü, açık sarı kaşlı, sarışın Rûsiyyü’l-asl Siyavuş b. Abdullah nâm abd-i memlûke bundan akdem firâr ettikden sonra hâlâ mahmiye-i İstanbul’da kethüdâyeri olan Sefer Paşazâde Mustafa Ağa ahz edip benim için hıfz üzre iken mezbûr bostancı Mustafa mevsûf-ı mezbûr için bizim yoldaşlarımızdandır deyû mevsûf-ı mezbûr[u] merkūm Mustafa Ağa’nın yedinden ahz ettikden sonra firâr etmişdir suâl olunup mevsûf-ı mezbûrun kıymeti olan yüz kırk dört esedî guruşun mezbûr Bostancı Mustafa’dan tazmîn olunup alıverilmesi matlûbumdur dedikde gıbbe’s-suâl mezbûr Bostancı Mustafa cevâbında bostancılarımızdan birini mezbûr Mustafa Ağa’nın hapsinde bulup almış idim deyip müdde‘î-i mezbûrun abd-i memlûkü mevsûf-ı mezbûru vech-i muharrer üzre ahzını inkâr edicek müdde‘î-i mezbûrdan müdde‘âsını mübeyyine beyyine taleb olundukda dergâh-ı âlî yeniçerilerinden yirmi yedinci sekbânlara mahsûs oda yoldaşlarından Mehmed Beşe b. Abdullah ve Yunus Beşe b. Mehmed nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka abd-i âbık olmak üzre mezbûr Mustafa Ağa’nın bundan akdem hapsinde olan orta boylu, elâ gözlü, açık sarı kaşlı, sarışın Rûsiyyü’l-asl Siyavuş b. Abdullah nâm gulâm müdde‘î-i mezbûrun abd-i memlûkü olup mezbûr Bostancı Mustafa mevsûf-ı mezbûr için yoldaşlarımızdandır deyû müdde‘î-i mezbûrun abd-i memlûkü olan mevsûf-ı mezbûru merkūm Mustafa Ağa’nın yedinden ahz u kabz edip kıymeti dahi yüz kırk dört esedî guruş idi ba‘dehû mevsûf-ı mezbûr firâr etmekle mevsûf-ı mezbûrun kıymet-i şer‘iyyesi olan yüz kırk dört esedî guruşu müdde‘î-i mezbûra zâmin olmak mezbûr Bostancı Mustafa üzerine lâzımdır, biz [bu] husûsa bu vech üzre şâhidiz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânın keyfiyyet-i hâllerini suâl için küttâb-ı mahkemeden mevlânâ Mehmed Efendi b. Abdülbâkī irsâl olunup ol dahi şâhidân-ı mezbûrânın sâkin oldukları mârrü’z-zikr odaya varıp ahâlîsinden odabaşısı Durmuş ve Süleyman Beşe b. Ali ve Ahmed Beşe b. Mehmed ve Mustafa Beşe b. İbrahim ve Ali Beşe b. İbrahim ve Mustafa b. Ali ve odabaşı Ahmed Çelebi b. Mustafa ve İbrahim Beşe b. Ramazan ve Ramazan Beşe b. Hüseyin nâm kimesnelerden şâhidân-ı mezbûrânın keyfiyyet-i hâllerini suâl ettikde her biri şâhidân-ı mezbûrân için adl ve makbûlü’ş-şehâdelerdir deyû haber verdiklerini mevlânâ-yı mezbûr mahallinde tahrîr ba‘dehû ma‘an irsâl olunan Şaban b. Mehmed ile meclis-i şer‘-i hatîre gelip [alâ] vukū‘ihî inhâ ve takrîr edip bir vechile alenen ve ba‘dehû sırren ta‘dîl [ve] tezkiyye olunduklarından sonra şehâdetleri makbûle olmağın mûcebince mevsûf-ı mezkûrun kıymet-i şer‘iyyesi olan yüz kırk dört esedî guruşu müdde‘î-i mezbûra zâmin olup vermek üzre mezbûr Bostancı Mustafa üzerine hükm olunmağın mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâmin min Recebi’l-mürecceb li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm kebîrü’l-küberâi’l-fihâm defterdâr Mehmed Paşa, umdetü’l-emâcid ve’l-ekârim çavuşbaşı İsmail Ağa, fahrü’l-akrân ve’l-ekfâ muhzır Mustafa Ağa, umdetü’l-emâsil ve’l-a‘yân Eyüb Ağa b. Ahmed Kethüdâ-yı hazret-i Efendi