|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 108 Hüküm no: 111 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Todori v. Andriye’nin Borcunu ödemesi için Zafira v. Dimitri’ye tembih
Havâss-ı Aliyye kazâsına tâbi‘ kasaba-i Çatalca[’da sâkin] Todori v. Andriye nâm zimmî mahfil-i kazâda Zafira v. Dimitri nâm zimmî muvâcehesinde üzerine takrîr-i da‘vâ edip târih-i kitâbdan üç sene mukaddem mahmiye-i İstanbul’da vâki‘ sicn-i sultânîde merkūm Zafira benim yedimden yirmi beş kıt‘a esedî guruş istikrâz ve kabz edip ben dahi ikrâz ve teslîm etmişken hâlâ taleb eylediğimde teslîmden imtinâ‘ eder suâl olunup alıverilmesi matlûbumdur deyicek gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrede Sultan Selim semtinde yoğurtçu tâifesinden Hıristo v. Nikola ve Bakkal Yorgi v. Dimo nâm zimmîler li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ târih-i mezbûrda sicn-i sultânîde merkūm Zafira bizim huzûrumuzda müdde‘î-i mezbûra min ciheti’l-karz zimmetimde yirmi beş esedî guruş lâzımü’l-edâ deynimdir deyû ikrâr ve bizim huzûrumuzda bizi istişhâd eyledi biz bu husûsa şâhidleriz, şehâdet dahi ederiz deyû her biri edâ-yı şehâ[de]t-i şer‘iyye eylediklerinde gıbbe ri‘âyet-i’ş-şerâiti’l-kabûl şehâdetleri makbûle olmağın mûcebiyle mârrü’z-zikr yirmi beş esedî guruşu müdde‘î-i mezbûra edâ ve teslîme merkūm Zafira’ya tenbîh olunup kayd şud. Fî 14 min Şevvâl sene [10]81.
Şuhûdü’l-hâl: Mehmed Çelebi b. Mahmud, Hasan [b.] Abdullah, Ramazan Bey, Mustafa Efendi el-Müderris.
|