|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 109 Hüküm no: 113 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mimar Mehmed Ağa’nın evlâda meşrût vakfının kiraya verilmesi
Husûs-ı âti’l-beyânı mahallinde ketb ve tahrîr için savb-ı şerî‘at-ı şerîfeden Mevlânâ Salih Mehmed Efendi b. Mehmed irsâl olunup ol dahi zeyl-i kitâbda muharrerü’l-esâmî müslimîn ile medîne-i Hazret-i Ebâ Eyyûb el-Ensârî -aleyhi rıdvâni’l-Bârî- mahallâtından Çavuş Kasım mahallesi sâkinlerinden olup hasbahçe bostânîlerinden -fahrü’l-emâsil ve’l-eşbâh- Hüseyin Bey b. Ramazan’ın sâkin olduğu menzile varılıp beyne’l-vâzı‘u’ş-şerîf[de] akd-i meclis-i şer‘-i münîf olundukda Dârü’l-hilâfeti’l-aliyye-i Kostantıniyyetü’l-mahmiyye’de Mesih Paşa-yı Atîk mahallesi sükkânından -kıdvetü’l-emâcid ve’l-ekârim- mi‘mâr-ı sâbık Mehmed Ağa merhûmun necl-i necîbi Durak Bey meclis-i ma‘kūd-ı mezkûrda işbu kitâb-ı sıhhat-nisâbın sâhibi mûmâ-ileyh Hüseyin Bey mahzarında ikrâr-ı tâm ve takrîr-i kelâm edip cennet-mekân firdevs-âşiyân merhûm ve mağfûrun-leh Sultan Ahmed Han, v[â]lid-i mâcidim mezkûr Mi‘mâr Mehmed Ağa’ya vilâyet-i Rumeli’nde livâ-i Selânik aktâ‘ından Avrethisarı nâhiyesinde bâ-hatt-ı hümâyûn-ı sa‘âdet-makrûn hibe ve temlîk eylediği İstoyak ve Graşel ve Gramatine nâm karyeleri vâlidim merhûm-ı mezbûr evlâd u evlâdına vakf etmeğin nevbet-i tevliyyet ve tasarruf ile’l-ân benim olmağın zikr olunan kurâyı beher senesi yüz otuzar bin akçeye olmak üzre dört senede bir tahvîl olunup işbu seneden bin seksen dört senesi gāyetine değin cem‘an beş yük yirmi bin akçeye mûmâ-ileyh Hüseyin Bey’e der-uhde ve iltizâm ve yedine dört senenin her biri için mümzâ ve mahtûm ve mu‘anven ve mersûm temessükü verip ol dahi kabûl ve mârrü’z-zikr beş yük yirmi bin akçeyi, beş yüz elli üç Frengî yaldız altını ve beş yüz otuz bir Macar altını mâ‘adâ esedî guruş bana def‘ ve teslîm ben dahi tevliyyetim hasebiyle vakıf için alıp kabz eyledim dedikde gıbbe’t-tasdîki’l-mu‘teber mukırr-ı mezbûrun sulbî kebîr oğulları Mehmed Ağa ve evlâd-ı yetîm Ali Ağa ve Hasan Ağa meclis-i mezbûrda zikr olunan kurâyı mûmâ-ileyhe zabtı müyesser olmayıp bi hasebi’ş-şer‘ meblağ-ı mezbûr kendiye red lâzım gelirse biz malımızdan edâya babamız mûmâ-ileyh emriyle zâmin olu[ruz deyû h]er biri ikrâr etmeğin ba‘de’l-kabûl mevlânâ-yı mezbûr mahallinde tahrîr ba‘dehû mütâba‘at olunan Çukadâr Ahmed Çelebi ve Muhzır Mehmed ile meclis-i şer‘a gelip alâ vukū‘ihî her biri inhâ ve takrîr etmeğin mâ vaka‘a bi’t-taleb ketb olundu. Fi’l-hâmisi aşer min Şevvâli’l-mükerrem sene ihdâ ve semânîn ve elf.
Şuhûdü’l-hâl: Mustafa Bey b. Ali el-Cündî, Ahmed Usta b. Şaban Üstâd-ı bahçe-i karye-i Cebeci, Süleyman b. Abdullah el-Cündî, Mehmed b. Abdullah, Süleyman Efendi b. Ali Bey bevvâb-ı sultânî, Ramazan Çelebi b. Mehmed el-Müezzin, Oruc Bey b. Osman Esîrî, Hüseyin Usta b. Ali Üstâd-ı Ayasofya, Mustafa b. Süleyman ve gayruhüm mine’l-huddâm.
|