|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 110 Hüküm no: 114 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Osman Beşe b. Receb’in ev ve değirmen hissesini, Ahmed Bey b. Yusuf’a satışı
Vilâyet-i Rumeli’nde Kalevrete kazâsına tâbi‘ Gerhos nâm karye sâkinlerinden Dergâh-ı âli -dâme mahfûfen bi’l-me’âlî- yeniçerilerine mahsûs odalardan onuncu ağa bölüğü odasının odabaşısı olan Osman Beşe b. Receb tarafından husûs-ı âti’l-beyânı ikrâra vekîl olup vekâleti Ali Beşe b. Şehsüvar ve Süleyman b. Abdullah şehâdetleri ile şer‘an vekâleti sâbite olan eş-Şeyh Abdullah Efendi b. Ali meclis-i şer‘de işbu râfi‘ü’l-kitâb Ahmed Bey b. Yusuf mahzarında bi’l-vekâle ikrâr edip akd-i âti’z-zikrin sudûruna değin müvekkilimin silk-i mülk-i sahîhinde münselik emlâkinden karye-i mezbûrede vâki‘ iki tarafı müvekkil-i mezbûrun mülk bahçesi ve bir tarafı Birâderzâde Hasan Çelebi mülkü ve Hüseyin Çelebizâde mülkü ve ba‘zan tarîk-i âm ile mahdûd bir bâb fevkānî ve bir tahtânî odaları ve bir ahırı müştemil mülk-i mevrûs menzilini ve yine karye-i merkūme içinde cârî su üzerinde dâir bir göz değirmenin nısfında olan dört sehimde üç sehim hisse-i şer‘iyyemi ve vâlidesinden irs-i şer‘ ile intikāl eden hisse-i şer‘iyye-i şâyi‘asını mezbûr Ahmed Beşe’ye bi safkatin vâhidetin yetmiş kıt‘a esedî guruşa bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl eyleyip ve yine tefvîz-i âtî sudûruna değin karye-i mezbûrede vâki‘ her birinin hudûdu beynlerinde ma‘lûm yirmi kıt‘a tarlalarda olan hisse-i şer‘iyyesini dahi sâhib-i arz ma‘rifetiyle otuz kıt‘a esedî guruş bedel mukābelesinde mezbûr Ahmed Beşe’ye tefvîz bi’l-ferâğ edip ol dahi tefevvuz ve kabûl eylediğimden sonra semen-i mezbûr ile bedel-i merkūm cem‘an yüz esedî guruşu yedinden bi’t-tamâm ve’l-kemâl ahz u kabz eyleyip emlâk-i mezbûreyi ve arâzi-i merkūmeyi mahallinde zabt ve tasarrufa dahi tarafından taslît edip emlâk-i mezbûra mülk-i müşterâsı ve arâzi-i merkūme dâhil-i taht-ı tasarrufu olmuşdur Keyfe mâ yeşâ’ mutasarrıf olsun dedi dedikde mâ vaka‘a kayd şud. Fî 16 min Şevvâl sene [10]81.
Şuhûdü’l-hâl: Mahmud Ağa b. Abdülmennân, Hasan Beşe b. Ali, Ebû Bekir Beşe b. ( ), Mahmud Beşe b. er-Râcil, Mehmed Beşe b. er-Râcil ve gayruhüm mine’l-huddâm.
|