.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 115
Hüküm no: 120
Orijinal metin no: [24b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan b. Mustafa’nın Mustafa b. Mehmed’deki alacağını aldığı

Vilâyet-i Rumeli’nde vâki‘ medîne-i Florina’da sâbıkan cizyedâr ve câmi‘-i avârız olan Hasan Ağa b. Mustafa meclis-i şer‘-i şerîfde medîne-i mezbûrede sâbıkan mesned-nişîn-i şerî‘at-i Muhammedî olan umdetü kuzâti’l-İslâm- sâhibü’l-kitâb Mustafa Efendi b. Mehmed mahzarında ikrâr ve takrîr-i kelâm edip mûmâ-ileyh Mustafa Efendi târih-i kitâbdan on altı ay mukaddem medîne-i mezbûrede kadı iken benden bi gayri hakkın vech-i şer‘î sekiz bin fıddî nakd-i râyicü’l-vakt akçe alıp hâlâ meblağ-ı mezbûru mûmâ-ileyh efendiden taleb ve da‘vâ eylediğimde inkâr ile cevâb vermeğin beynimizde münâza‘ât-ı kesîre cereyânından sonra vesâtat-ı muslihûn ile da‘vâ-yı mezkûrumdan beni dört bin fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan mezbûrü’n-na‘t dört bin akçeyi tamâmen müşârun-ileyh Mustafa Efendi’den alıp kabz edip mâ‘adâ da‘vâsından zimmetini ibrâ ve iskāt eyledim min ba‘d mûmâ-ileyh Mustafa Efendi ile vechen mine’l-vücûh da‘vâ ve nizâ‘ım yoktur zuhûr ederse dahi lede’l-hükkâmi’l-kirâm mesmû‘a ve makbûle olmaya deyicek kayd şud. Fî 14 min Şevvâl sene [10]81.


Şuhûdü’l-hâl: Mehmed Efendi b. Şeyh Osman el-kadı, Ali Çelebi b. Hızır, Halil Çelebi b. Hüdâverdi, Ahmed Çelebi b. Mehmed, Mustafa Bey b. Hasan.