.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 114
Hüküm no: 119
Orijinal metin no: [24a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yakub Usta Vakfı’na hâlâ ödenmemiş olan kira gelirlerinin Kiryani v. Diro’nun varislerince ödenmesi

Havâss-ı Aliyye kazâsına tâbi‘ Makrihorya nâm karyede imâm ve hatîb ve merhûm Yakub Usta nâm sâhibü’l-hayrın nükūd-ı mevkūfesine bi’l-fi‘l mütevellî olan Abdülbâkī Efendi b. Hasan meclis-i şer‘de bundan akdem karye-i mezbûrede sâkin iken mürd olan Kiryani v. Diro nâm zimmînin sulbî sagīr oğlu Kalini ve sulbiye sagīre kızı Sultana’nın tesviye-i umûru için kıbel-i şer‘den mansûb vasî olan Yusuf Bey b. Ali nâm bostân[î] mahzarında üzerine takrîr-i da‘vâ edip merkūm Kiryani bin elli sekiz senesinde hâl-i hayâtında iki tarafı Yani ve ba‘zan Angeli mülkleri ve iki tarafı tarîk-i âm ile mahdûd mülk menzilini mâl-ı vakf-ı mezbûrdan üç bin beş yüz fıddî râyic fi’l-vakt akçeye bi tarîki’l-istiğlâl bey‘ ol zamânda mütevellî olan Bayezid Usta dahi iştirâ ve ba‘de’t-tahliye ve’t-tekābuz menzil-i mezbûr senede üç yüz elli akçe icâre ile yine mezkûr Kiryani’ye îcâr ol dahi istîcâr edip beş yüz akçesini hâl-i hayâtında vakf-ı mezbûra edâ edip üç bin akçesini kable’l-edâ mürd olmağla hâlâ asl-ı mâl-ı vakfa, mezbûr on bir senede müctemi‘an beher senesi üçer yüz akçeden üç bin üç yüz akçeyi vasiyy-i mezbûrdan taleb ederim suâl olunup vakf-ı mezbûr için alıverilmek matlûbumdur deyû târih-i mezbûr ile müverrah ve târih-i mezbûrda medîne-i Hazret-i Ebâ Eyyûb el-Ensârî’de bâb nâibi olan Mevlânâ Nuh Efendi b. Mehmed imzâsıyla mümzâ ve hâtemiyle mahtûme min külli’l-vücûh mütevellî-i mezbûrun takrîr-i meşrûhuna mutâbık istiğlâl hücceti ibrâz etmeğin ba‘de’l-feth ve’l-kırâe vasiyy-i mezbûrdan husûs-ı mezbûr suâl olundukda inkâr ile cevâb vermeğin mütevellî-i mezbûrdan müdde‘âsını mübeyyine beyyine taleb olundukda udûl-i ricâlden karye-i mezbûre müezzini Muharrem Çelebi b. Murad ve Ramazan Beşe b. Abdullah ve Mustafa Ağa b. İbrahim ve el-Hâc İbrahim b. Abdullah nâm kimesneler li ecli’ş-şehâde makām-ı kazâda hâzırûn olup istişhâd olunduklarında fi’l-vâki‘ hâlik-i mezbûr, târih-i merkūmda menzil-i mahdûd-ı mezkûru hâl-i hayâtında mâl-ı vakf-ı mezbûrdan üç bin beş yüz akçe mukābelesinde mütevellîsine bi tarîki’l-istiğlâl bey‘ ve teslîm ve kabz-ı semen ve senede üç yüz elli akçe icâre ile menzil-i mezbûru istîcâr ve kabz edip beş yüz akçesini hâl-i hayâtında edâ ve teslîm mâ‘adâ üç bin akçeyi kable’l-edâ mürd olmağla zimmetinde bâkī kalmışdır biz bu husûsa şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın zikr olunan üç bin akçe asl-ı mâl-ı vakf-ı mezbûrun on bir sene murâbahasını ki beher sene üçer yüz akçeden üç bin üç yüz akçeden küllen ve ba‘zan hâlik-i mezbûrdan hayâtında veyâhud vârislerinden ahz ve istifâ veya taraf-ı şer‘iyyeden biriyle zimmetini ibrâ eylemediğine mütevellî-i mezbûra yemîn teklîf olundukda ol dahi alâ vefki’l-mes’ûl yemîn billâhi te‘âlâ edicek mûcebiyle ba‘de’l-hükm mâ vaka‘a ketb olundu. Fi’l-yevmi’s-sâdisi aşer min Şevvâl sene ihdâ ve semânîn ve elf.


Şuhûdü’l-hâl: İlyas b. Ali, Mehmed b. Mahmud, Ali b. Abdullah, Eyüb Çelebi b. Abdullah ve gayruhüm.