Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 325 Hüküm no: 369 Orijinal metin no: [50b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Yusuf b. Abdullah’ın, mallarını satmak üzere anlaştığı Hüseyin Çelebi b. Abdullah ile olan hesaplamasında alacaklı olduğu Mahmiye-i İstanbul’da Murad Paşa mahallesinde sâkin el-Hâc Yusuf b. Abdullah nâm kimesne meclis-i şer‘-i hatîr-i lâzımü’t-tevkīrde Hüseyin Çelebi b. Abdullah mahzarında üzerine da‘vâ ve takrîr-i kelâm edip mahmiye-i mezbûrede Yağlıkçılar sûkunda vâki‘ el-Hâc İvaz nâm kimesnenin taht-ı îcârımda olan dükkânı içinde mevcûd beynimizde ma‘lûm yirmi iki bin akçeye mukaddem yağlıkçı metâ‘ımı fâide ile bey‘ edip nemâsının nısfı benim ve nısf-ı âharı mezbûrun olmak üzre bir sene mukaddem merkūm Hüseyin Çelebi’ye teslîm edip ol dahi ba‘de’l-kabz eşyâ-i mezbûreyi otuz bin akçeye âhara bey‘ ve semeninden yirmi beş bin akçesini kabz edip makbûzu olan meblağ-ı mezbûrun beş bin akçesi olan zimemde olup üç bin iki yüz akçesini dükkân-ı mezbûrun icâresi için verip ve dokuz bin yedi yüz elli akçesini bana teslîm edip bâkī on iki bin akçesi yedinde kalmağla suâl olunup yedinde olan meblağ-ı bâkī-i mezbûru ve zimemde olan meblağ-ı mezbûr beş bin akçeyi ba‘de’l-ahz bana teslîme mezbûr Hüseyin Çelebi’ye tenbîh olunmak matlûbumdur dedikde gıbbe’s-suâl mezbûr Hüseyin Çelebi cevâbında vech-i muharrer üzre makbûzum olan eşyâ-i mezbûreyi yirmi bir bin beş yüz elli akçeye bey‘ edip semeninden on altı bin beş yüz elli akçesini kabz etmişidim lâkin mezbûr el-Hâc Yusuf eşyâ-i mezbûreyi kaç güne değin bey‘ edersen günde sana onar akçe ücret vereyin demekle ben dahi bir senede bey‘ etmekle meblağ-ı mezbûrdan üç bin altı yüz akçesini bir senede ücretime tutup ve vech-i muharrer üzre bâkīnin üç bin iki yüz akçesini dükkân-ı mezbûrun ücreti için verip ve dokuz bin yedi yüz elli akçesini dahi müdde‘î-i mezbûra teslîm edip ve beş bin akçe zimemde olmağla yedimde bir akçe bâkī kalmadı, eşyâ-i mezbûreyi yirmi bir bin beş yüz elli akçeden ziyâdeye bey‘in inkâr edicek gıbbe’l-istintâk mezbûr el-Hâc Yusuf mezbûr Hüseyin Çelebi’ye vech-i mübeyyen üzre günde onar akçe ücret verecek olduğunu inkâr edicek müdde‘î-i mezbûrdan ziyâde da‘vâsı için mezbûr Hüseyin Çelebi’den ücret kavli için beyyine taleb olundukda her biri ityân-ı beyyineden izhâr-ı acz ile âharı istihlâf etmeğin mezbûr Hacı Yusuf’a vech-i muharrer üzre ücret kavl etmediğine ve mezbûr Hüseyin Çelebi’ye eşyâ-i mezbûreyi yirmi bir bin beş yüz elli akçeden ziyâdeye bey‘ etmediğine yemîn teklîf olundukda anlar dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mezbûr Hüseyin Çelebi’ye vech-i muharrer üzre ücret deyû alıkoduğu üç bin altı yüz akçeyi müdde‘î-i mezbûra âcilen teslîme ve zimemde olan beş bin akçeyi erbâb-ı zimemden ba‘de’l-kabz teslîme tenbîh olunmağın mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Mehmed Bey, Hasan Çelebi b. Ahmed, Baba Resul b. Rıdvan ve gayruhüm mine’l-hâzırîn.