Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 326 Hüküm no: 370 Orijinal metin no: [50b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pertev Paşa Vakfı’na ait bir evde kiracı olan Safer v. Avanok’tan üç senelik kira bedelinin alınması gerektiği Mahmiye-i İstanbul’da merhûm Pertev Paşa vakfı’na kāimmakām-ı mütevellî olan vakf-ı mezbûr câbîsi işbu bâ‘isü’l-kitâb Eyüb Çelebi b. Süleyman meclis-i şer‘-i hatîr-i lâzımü’t-tevkīrde Safer v. Avanok nâm Ermeni muvâcehesinde üzerlerine da‘vâ ve takrîr-i kelâm edip mahmiye-i mezbûrede Sulu Manastır mahallesinde vâki‘ lede’l-ahâlî ve’l-cîrân ma‘lûmetü’l-hudûd mezbûr Safer’in sâkin olduğu menzili bin yetmiş üç Cumâdelûlâsı’ndan vakf-ı mezbûr mütevellîsi mezbûr Safer’e senede on yedişer buçuk esedî guruşa îcâr ve teslîm ol dahi vech-i muharrer üzre istîcâr ve kabûl ve tesellüm eyledikden sonra ücret-i merkūmdan târih-i kitâb senesi Cumâdelûlâsı ibtidâsına gelince dört senede ücret-i merkūmeden Safer zimmetinde yetmiş kıt‘a esedî [51a] guruş zimmetimde müctemi‘ olmuşidi lâkin bir senenin ücreti olan on yedi buçuk guruşu mütevellî-i mezbûra teslîm edip bâkī zimmetimde on senenin ücreti olan elli iki buçuk esedî guruş kalmışidi deyû üç senenin ücreti zimmetinde vakf-ı mezbûra deyni olduğunu ikrâr edip bir senenin ücretini edâ etmişdir deyû def‘ edicek gıbbe’l-istintâk ve’l-inkâr merkūm Safer’den def‘-i mezbûrunu mübeyyine beyyine taleb olundukda ityân-ı beyyine için istimhâl etmeğin şer‘î ile imhâl olundukdan sonra ikrârı mertebesi olan ücret-i merkūmeden üç senede müctemi‘ olan elli iki buçuk esedî guruşu mütevellî-i mezbûra def‘ ve teslîme merkūm Safer’e tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Çelebi b. Mustafa, Abdi Çelebi b. Hüseyin, Baba Resul b. Rıdvan, İbrahim Çelebi b. Ahmed ve gayruhüm.