|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 117 Hüküm no: 124 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dördüncü Haseki Ayşe Sultan’ın kiracı olarak oturduğu Abdurrahman Paşa’nın vakıf sarayının suyollarını tamir ettirip su miktarını arttırdığı
Dârü’l-hilâfeti’l-aliyye-i Kostantıniyyetü’l-mahmiyye hısnı ebvâbından Ahırkapı kurbunda sâkine umdetü’l-muhadderât Dördüncü Haseki Ayşe Sultan hazretleri taraf-ı şerîflerinden husûs-ı âti’z-zikre vekîl olup zâtını ma‘rifet-i şer‘le ârifân olan el-Hâc Ebû Bekir Ağa b. Mahmud ve Teberdâr Hasan Bey b. Veli şehâdetleriyle şer‘an vekâleti sâbite olan iftihârü’l-havâs ve’l-mukarrabîn Bilal Ağa b. Abdülmu‘în meclis-i şer‘-i hatîrde merhûm Abdurrahman Paşa nâm sâhibü’l-hayrın evkāfına bi’l-fi‘l mütevellî olan fahrü’l-eşbâh Siyavuş Ağa b. Abdullah mahzarında bi’l-vekâle ikrâr ve takrîr-i kelâm edip merhûm Abdurrahman Paşa evkāfından mahmiye-i mezbûrede Hocapaşa semtinde Elvanzâde mahallesinde vâki‘ lede’l-ahâlî ve’l-cîrân ma‘lûmü’l-hudûd sarayı icâre-i mu‘accele ve ücret-i ma‘lûmeteyn ile müvekkilem sultân-ı müşârun-ileyhâ hazretleri taht-ı tasarruflarında olup saray-ı mezkûrda cârî olup vakfiye-i ma‘mûlün-bihâsında mastûr olan mâ’-i cârînin mikdârı zikr olunmayıp mâ’-i mezkûr kalîl olmağla müvekkilem sultân-ı müşârun-ileyhâ malıyla mâ’-i mezkûrun menbâ‘ını tathîr ve mikrâs ta‘bîr olunur lağımlar ve âbâr-ı müteferrika hafr ettirmekle bir mikdâr su dahi cemî‘ ve tahsîl ve kıbel-i şer‘den nâib ve su nâzırı ma‘rifetiyle mârrü’z-zikr suyu keşf ve tahrîr ve ke’l-evvel merhûm-ı mezbûr Abdurrahman Paşa lağımına idrâc ve mâ’-i mezkûrun cümlesi sekiz masura su idiği sicil ve hüccet olundukdan sonra merhûm-ı mezbûr Abdurrahman Paşa’nın saray duvarında ke’l-evvel cârî olan bir masura su idiğini müvekkilem sultân-ı mûmâ-ileyhâ ikrâr ve mütevellî-i mezbûr Siyavuş Ağa dahi tasdîk edip bâkī yedi masura suyun bir buçuk masurasını müvekkilem sultân-ı müşârun-ileyhâ hazretleri merhûm-ı mezbûrun bâlâda zikr olunan lağımı ki cem‘ eylediği suyu ol lağıma idrâc eylemişdir ol mukābelede teberru‘an mütevellî-i mezbûra teslîm ol dahi vakıf için tesellüm edip murâd eylediği mahalden ifrâz edip Keyfe mâ yeşâ’ tasarruf eylesin deyû müvekkilem sultân-ı müşârun-ileyhâ hazretleri ikrâr ve i‘tirâf eyledi deyicek vekîl-i mezbûru kelimât-ı muharreresinde mütevellî-i mezbûr vicâhen tasdîk etmeğin kayd şud. Fî 20 min Şevvâl sene [10]81.
Şuhûdü’l-hâl: Es-Sâbikūn. Derkenâr: Siyavuş Ağa suyu.
|