.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 118
Hüküm no: 125
Orijinal metin no: [25a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Çoban Yorgi’nin hazineye intikal eden muhallefâtından alacak tahsili

Medîne-i Hazret-i Ebâ Eyyûb el-Ensârî’de Çömlekçiler sûkunda yoğurtçu tâifesinden Yani v. Nikola nâm zimmî Büyük Haslar’da hâlâ gümrük emîni kıbelinden zâbit ve emîn-i beytülmâl olan sâhibü’l-kitâb Mehmed Bey b. Abdullah mahzarında ikrâr ve takrîr-i kelâm [edip] Havâss-ı aliyye kazâsına tâbi‘ Küçükçekmece nâhiyesi a‘mâlinden Ispartuvan nâm karyede ra‘y-ı ağnâm ederken mürd olan Yorgi nâm zimmînin zâhirde vâris-i ma‘rûf ve ma‘rûfesi olmamağla mecmû‘ metrûkâtına emîn-i mezbûr Mehmed Bey vaz‘-ı yed edip zabt etmeğin a‘dâd ve esmânı beynimizde ma‘lûm yedinden müşterâ ve makbûz koyun bahâsından yalnız mezbûr Yorgi zimmetinde dokuz bin dört yüz akçe hakkım olmağın metrûkât-ı hâlik-i mezbûrdan olmak üzre emîn-i mezbûrdan meblağ-ı mezbûru taleb ve da‘vâ eylediğimde metrûkât-ı hâlik-i mezbûra vaz‘-ı yedini ikrâr lâkin hâlik-i mezbûrun bana minvâl-i muharrer üzre dokuz bin dört yüz akçe deyni olduğunu inkâr etmeğin ben müdde‘âmı emîn-i mezbûr muvâcehesinde isbât sadedinde iken beynimize muslihûn tavassut edip da‘vâ-yı mezbûrumdan emîn-i mezbûr ile beni beş bin fıddî nakd-i râyic fi’l-vakt akçe üzre inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan beş bin akçeyi emîn-i mezbûr Mehmed Bey yedinden alıp kabz edip mâ‘adâ da‘vâsından mezbûr Mehmed Bey zimmetini ibrâ ve iskāt eyledim dedikde gıbbe’t-tasdîk mâ vaka‘a kayd şud. Fî 21 min Şevvâl sene [10]81.


Şuhûdü’l-hâl: Abdullah b. Abdullah el-Müezzin, Mustafa Efendi b. el-Müderris, İbrahim Çelebi b. Cafer, Mustafa Beşe b. Abdullah, Mehmed Çelebi b. Salih, Mehmed Efendi b. Mehmed ve gayruhüm