Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 130 Hüküm no: 145 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muallimhâne vakfından alınan borcun vakfa iadesi için vasî Hüseyin Bey’e mahkemece tembih olunduğu Havâss-ı aliyye kazâsı a‘mâlinden kasaba-i Hasköy’de Kiremitçi Ahmed Çelebi Câmi‘-i şerîfi kurbunda vâki‘ mu‘allimhânenin nükūd-ı mevkūfesine bi’l-fi‘l mütevellî olan es-Seyyid Mustafa Çelebi’nin babası ve tarafından husûs-ı âti’l-beyânda vekîli olan es-Seyyid el-Hâc Mahmud b. es-Seyyid Hüseyin mahfil-i kazâda, kasaba-i mezbûrede sâkin mu‘allimhâne-i mezbûrenin sâbıkan halîfesi olan Mustafa Ağa b. Sinan’ın evlâd-ı sıgārına kıbel-i şer‘den mansûb vasî olan Hüseyin Bey b. İbrahim nâm bostânî mahzarında üzerine takrîr-i da‘vâ edip mâl-ı vakf-ı mezbûrdan müteveffâ-yı merkūm Mustafa Ağa zimmetinde mütevellî-i sâbık Üstâd Ali yedinden makbûz bin beş yüz akçe olup kable’l-edâ fevt olmağın hâlâ zikr olunan bin beş yüz akçeyi bi’l-vekâle müteveffâ-yı mezbûrun muhallefât-ı vâfiyesinden vakf-ı mezkûr için taleb ederim, suâl olunsun deyicek gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i ricâlden Kiremitçi Ahmed Çelebi Câmi‘i imâmı Mehmed Efendi b. Mehmed ve müezzini Abdülbâkī Çelebi b. Ahmed li ecli’ş-şehâde makām-ı kazâya hâzırân olup istişhâd olunduklarında fi’l-hakīka mütevellî-i sâbık mezbûr Üstâd Ali tevliyyeti hâzır bi’l-meclis Mehmed Çavuş’a teslîm eylediği mecliste müteveffâ-yı mezbûr Mustafa Ağa zimmetinde mâl-ı vakf-ı mezbûrdan bin beş yüz akçe gösterip ol dahi meblağ-ı mezbûr ile’l-ân zimmetimdedir deyû huzûrumuzda ikrâr ve bizi işhâd eyledi, biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mezbûr Mehmed Çavuş zamân-ı tevliyyetinde meblağ-ı mezbûru küllen ve ba‘zan ahz u istîfâ eylediğinde ihtimâmen yemîn teklîf olundukda ol dahi alâ vefki’l-mes’ûl mütevellî-i mezbûra teslîme vasiyy-i mezbûr[a] tenbîh birle mâ hüve’l-vâki‘ bi’t-taleb ketb olundu. Fî 23 min Zilka‘de sene [10]81. Şuhûdü’l-hâl: ( )