Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 135 Hüküm no: 151 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Abdullah’ın Ayşe bt. Hüseyin’e peşin parayla ev satışı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Evlice Baba mahallesinde sâkine Meryem bt. Abdullah nâm hâtun meclis-i şer‘-i şerîfde işbu râfi‘atü’l-vesîka Ayşe bt. Hüseyin nâm hâtun tarafından tasdîka vekîl olup nehc-i şer‘-i mu‘teber üzre vekâleti sâbite olan zevci Hüseyin Çelebi b. Hacı Bayram mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden mahalle-i mezbûrede vâki‘ bir tarafı Peştemâlî Hasan Çelebi mülkü ve bir tarafı diğer Hasan mülkü ve ba‘zan Bostanzâde Efendi mülkü ve bir tarafı Abdullah Halîfe mülkü ve bir tarafı tarîk-i âm ile mahdûd üç bâb tahtânî oda ve bir sofa ve bi’r-i mâ ve eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘ ve levâhıkı ile müvekkile-i mezbûre Ayşe Hâtun’a dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr dört bin akçeyi yedinden tamâmen ahz u kabz eyledim, zikr olunan menzil-i mahdûd-ı mezkûrda alâka ve medhalim yoktur, müvekkile-i mezbûre Ayşe’nin mülk-i müşterâsı olmuşdur Keyfe mâ yeşâ’ mutasarrıf olsun dedikde gıbbe’t-tasdîk kayd şud. Fî 9 min Zilka‘de sene [10]81. Şuhûdü’l-hâl: İbrahim Beşe b. Sefer, Abdi b. Mehmed, Osman b. Mehmed, Yunus b. Müyesser, Mehmed Efendi el-İmâm, Abdullah Efendi b. Abdullah el-Müezzin.