Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 135 Hüküm no: 150 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eğlence bt. Abdullah ile merhum kocası Ali b. İlyas’ın ortaklaşa kurdukları vakıf evdeki süknâ hakkını Mehmed b. Haydar’a devrettiği Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de Câmi‘-i kebîr mahallesi sâkinelerinden olup zikr-i âti menzilin vâkıfesi Eğlence bt. Abdullah meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed b. Haydar nâm kimesne mahzarında bi tav‘ihâ ikrâr ve takrîr-i kelâm edip bundan esbâk fevt olan zevcim Ali Efendi b. İlyas ile benim ale’l-iştirâki’s-seviy mülkümüz olup mahalle-i mezbûrede vâki‘ bir tarafı Hatice Hâtun mülkü ve bir tarafı Şeyh Nasrullah Efendizâde tasarrufunda olan menzil ve bir tarafı Yusuf Halîfe mülkü ve bir tarafı tarîk-i âm ile mahdûd iki bâb fevkānî ve bir bâb tahtânî odalar ve sofa ve müşterek su kuyusunu ve kenîfi müştemil mülk menzilimizi sene sittîn ve elf şehr-i Rebî‘ulevveli’nin yirmi birinci günü vakf-ı sahîh ve lâzım ile vakf ve habs ve süknâsını evvelen kendi nefsimize ba‘dehû kangımız vefât edip mecmû‘ menzili hayâtta olanımız zabt ve tasarruf edip ikimizin dahi vefâtından sonra meskene muhtâc racül-i sâlihe şart ve ta‘yîn ve vakfiye-i ma‘mûlün-bihâsını tastîr ettirmişdik, zevcim mezbûr fevt olmağla mecmû‘ menzil-i mahdûd-ı mezkûra ile’l-ân ben mutasarrıf idim, hâlâ hakk-ı süknâmı rızâ ve ihtiyârım ile merkūm Mehmed’e fâriğa oldum deyicek mezbûr Mehmed Salih de meskene muhtâc idiğini ihbâr-ı ahyâr ile müte‘ayyin olmağın hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri kıbelinden menzil-i mezkûru tasarruf için izin birle hâzihi’l-vesîka bi’l-ibtigā sebt olundu. Mine’l-âşir min Zilka‘deti’ş-şerîfe sene [10]81. Şuhûdü’l-hâl: Fahrü’l-eimme Mehmed Efendi b. (…) İmâm-ı evvel-i Câmi‘-i Kebîr, Mehmed Efendi b. İbrahim İmâm-ı sânî, Hüseyin Çelebi Kethüdâ, Mehmed b. Mahmud ve gayruhüm.