Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 137 Hüküm no: 155 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazaen yaralanan Rahime adlı bir câriye için diyet ödendiği Rahime bt. Abdullah nâm câriye-i sagīrenin seyyidesi olup medîne-i Hazret-i Ebâ Eyyûb el-Ensârî -dâme fî rıdvani’l-Bârî-de sâkine İsmihân bt. Osman nâm hâtun meclis-i şer‘-i hatîrde işbu bâ‘isü’l-vesîka Martin v. ( ) nâm Nasrânî muvâcehesinde bi tav‘ihâ ikrâr ve takrîr-i kelâm edip işbu târih-i kitâb günü vakt-i subhda işbu hâzıra bi’l-meclis câriye-i memlûkem sagīre-i mezbûre Rahime medîne-i mezbûre sûkunda hamam kurbunda kendi hâlinde giderken merkūm Martin bir yüklü bârgiri sevk ederek gelip câriye-i memlûkem sagīre-i mezbûreyi çiğneyip sağ ayağını mecrûh etmekle merkūm Martin’den da‘vâ ve mûcebini icrâ murâd eylediğimde merkūm Martin sagīre-i mezbûreyi hatâen çiğnemişimdir deyû ikrâr etmeğin beynimizde münâza‘ât-ı kesîre vukū‘undan sonra vesâtat-ı muslihîn ile merkūm Martin da‘vâ-yı mezkûrumdan beni beş yüz fıddî nakd-i râyic fi’l-vakt akçe üzerine inşâ-i akd-i sulh edip ben dahi mezbûru kabûl ve bedel-i sulh olan mezbûrü’n-na‘t beş yüz akçeyi mersûm Martin yedinden tamâmen alıp kabz edip husûs-ı mezbûra müte‘allik cemî‘ da‘vâdan zimmetini ibrâ eyledim deyicek gıbbe’t-tasdîki’ş-şer‘î mâ cerâ bi’l-ibtigā ketb olundu. Fi’s-sânî aşer min Zilka‘deti’ş-şerîfe sene ihdâ ve semânîn ve elf. Şuhûdü’l-hâl: Mehmed Çelebi b. Abdullah el-Attâr, İbrahim Çelebi b. Mehmed el-Cerrâh, Ömer Beşe b. Mehmed, Mustafa Efendi b. İsmail, Mehmed b. Mahmud.