Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 138 Hüküm no: 156 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Abdullah’ın vârisi Şirzat bt. Abdullah’ın Terkos’ta Bostan Çelebi’ye çiftlik satışı Mahmiye-i İstanbul’da Kâtib Muslihiddin mahallesinde sâkin iken bundan akdem vefât eden Ahmed Çelebi b. Abdülbâkī Çavuş’un verâseti zevce-i metrûkesi Şirzat bt. Abdullah nâm hâtun ile sulbî sagīr oğlu Mehmed’e münhasıra olup kable’l-kısme mezbûr Mehmed dahi fevt olup verâseti ancak vâlidesi Şirzat’a münhasıra olduğu şer‘an zâhir ve mütebeyyin oldukdan sonra mezbûre Şirzat meclis-i şer‘de işbu sâhibü’l-kitâb es-Seyyid Bostan Çelebi b. es-Seyyid Ahmed mahzarında bi tav‘ihâ ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden Havâss-ı aliyye kazâsı a‘mâlinden Terkos nâhiyesine tâbi‘ Şeyh nâm karyede vâki‘ iki tarafı Şirzat’ın âhar mutasarrıf olduğu tarlalar ve iki tarafı tarîk-i âm ile mahdûd iki bâb tahtânî oda ve bi’r-i mâ ve fırını müştemil çiftlik ta‘bîr olunur menzilimi ve yine bir tarafı Ömer Çelebi bağı ve iki tarafı tarîk-i âm ve bir tarafı sâhil-i bahr ile mahdûd bir bâb tahtânî oda ve ahır ve bi’r-i mâ ve bir mikdâr bahçeyi müştemil kezâlik çiftlik ta‘bîr olunur mülk-i mevrûs menzilimi cemî‘ tevâbi‘ ve levâhıkı ile mezbûr es-Seyyid Bostan Çelebi’ye bi safkatin vâhidetin beş bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyledikden sonra ol dahi minvâl-i muharrer üzre iştirâ ve kabûl ve kabz eyledikde merhûm ve mağfûr Sultan Bayezid Hân-ı Velî Evkāfı arâzisinden olup zabt ve taht-ı tasarrufumda olup zikr olunan çiftliğe intimâ‘ ile tahdîd ve tavsîfden müstağnî tefvîz-i âti’z-zikrin sudûruna değin karye-i mezbûre sınırı dâhilinde mevâzi‘-i adîdede vâki‘ tahmînen iki yüz keyl tohum istî‘âb eder tarlalarımın ve inde’l-ahâlî ve’l-cîrân ma‘lûmü’l-hudûd bir kıt‘a çayırıyla karye-i mezbûre sınırı dâhilinde vâki‘ Sazlık Gölü’nü dahi hakk-ı tasarruflarını bi izni’l-mütevellî mezbûr es-Seyyid Bostan Çelebi’ye yirmi bin akçe bedel mukābelesinde tefvîz bi’l-ferâğ eylediğimde ol dahi tefevvuz ve kabûl eylediğinden sonra semen-i mezbûr ile bedel-i merkūm yirmi beş bin akçeyi yedinden bi’t-tamâm ve’l-kemâl ahz u kabz eyledim min ba‘d emlâk-i mezbûrede alâka ve medhalim yoktur, mezbûr es-Seyyid Bostan Çelebi’nin mülk-i müşterâsı ve arâzi-i merkūme dâhil-i taht-ı tasarrufu olmuşdur, Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî 17 min Zilka‘deti’ş-şerîfe sene [10]81. Şuhûdü’l-hâl: Mustafa Çelebi b. Pervâne, Yusuf Çelebi b. Veli, Mehmed Çelebi b. Ahmed, Mehmed Efendi b. Ahmed, Mehmed Efendi el-İmâm, Mehmed Çelebi b. Hasan, Halil Çelebi b. Hüseyin, Hüseyin Çelebi b. Hasan, Muharrirü’l-hurûf Mustafa, Eyüb Efendi b. Mehmed el-Kâtib ve gayruhüm.