Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 148 Hüküm no: 172 Orijinal metin no: [33a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Hatun bt. Mehmed’in Hüsameddin Ağa’dan çiftlik rehini karşılığında borçlanması Havâss-ı aliyye kazâsına tâbi‘ Terkos nâhiyesi a‘mâlinden Tursun nâm karyede zikr-i câ’î çiftliğin sâhibesi olan Rukiye Hâtun bt. Mehmed Efendi meclis-i şer‘de fahrü’l-emâsil ve’l-akrân Hüsameddin Ağa b. Receb mahzarında ikrâr ve takrîr-i kelâm edip karye-i mezbûrede vâki‘ bir tarafı Kara Hasan harmanı ve bir tarafı Hasan Ağa bağı ve bir tarafı Hasan mülkü ve bir tarafı tarîk-i âm ile mahdûd olup müşârun-ileyh Hüsameddin Ağa’dan semen-i ma‘lûma iştirâ eylediğim mülk çiftliğimi bi cümleti’l-levâhık müşârun-ileyh Hüsameddin Ağa’ya min ciheti’l-karzi’ş-şer‘î zimmetimde lâzımü’l-edâ deynim olan yüz kıt‘a esedî guruş mukābelesinde mûmâ-ileyh Hüsameddin Ağa’ya rehin vaz‘ ve teslîm eylediğimde ol dahi ba‘de’t-tahliyeti’l-mu‘teber irtihân ve tesellüm ve kabûl ve kabz eyledi ba‘de’l-yevm zikr olunan yüz guruşu ağa-yı merkūma def‘ ve teslîm eylediğimde fekk-i rehin oluna deyicek kayd şud. Fî 4 min Zilka‘de sene [10]81. Şuhûdü’l-hâl: Mehmed Bey b. Derviş, Ahmed Beşe b. Abdullah, Mustafa Çelebi b. Süleyman, Veli Beşe b. er-Râcil, Baba Ramazan, Kaytas b. Abdullah.