Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 149 Hüküm no: 173 Orijinal metin no: [33a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Hatun bt. Mehmed’in Hüsameddin Ağa’ya olan borçlarını nakit ve eşya vererek tamamen ödediği Mahmiye-i İstanbul’da Karabaş mahallesinde sâkin fahrü’l-akrân Hüsameddin Ağa b. Receb meclis-i şer‘de işbu râfi‘ü’l-kitâb Rukiye Hâtun bt. Mehmed Efendi mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden Havâss-ı aliyye kazâsı mahallâtından Terkos nâhiyesine tâbi‘ Tursun nâm karyede vâki‘ bir tarafı Kara Hasan Ağa mülkü harman ve bir tarafı Hasan Ağa bağı ve bir tarafı yine mezbûr Kara Hasan mülkü ve bir tarafı tarîk-i âm ile mahdûd iki bâb tahtânî oda ve iki çardak ve bir ahır ve üç göz anbar ve iki samanlık ve bir fırın ve kenîfi müştemil mülk çiftlik ta‘bîr olunur mülk menzilimi ve içinde mevcûd bir çift kara sığır öküzü ve iki inek ve iki tosun ve bir araba ve bir saban demiri ve bir mikdâr çavdar otluğu mezbûre Rukiye Hâtun’a iki yüz kıt‘a esedî guruşa bi safka-i vâhide tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyleyip ve yine tefvîz-i âtî sudûruna değin karye-i mezbûrede vâki‘ tahmînen iki yüz keyl tohum istî‘âb eder tarlalarımın dahi hakk-ı tasarruflarını bi izni’l-mütevellî yetmiş beş kıt‘a esedî guruşa bedel mukābelesinde mezbûre Rukiye Hâtun’a tefvîz bi’l-ferâğ eylediğimde ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an iki yüz yetmiş beş esedî guruşu yedinden bi’t-tamâm ve’l-kemâl ahz u kabz eyledim min ba‘d çiftlik-i mezbûrede ve eşyâlarda alâka ve medhalim yoktur mezbûre Rukiye Hâtun’un mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîk kayd şud. Fî 4 min Zilka‘de sene [10]81. Şuhûdü’l-hâl: Es-Sâbikūn.