Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 150 Hüküm no: 176 Orijinal metin no: [33b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. İsmail’in miras hissesini Dimitraki’ye satışı Vilâyet-i Rumeli’nde Mora sancağında Kalavrite kazâsına tâbi‘ Bodimye nâm karye ahâlîsinden iken bundan akdem vefât eden İsmail Çavuş’un verâseti sulbî kebîr oğlu Mehmed ile sulbiye kebîre kızı Ayni nâm hâtuna münhasıra idiği şer‘an sâbit ve zâhir oldukdan sonra mezbûr Mehmed meclis-i şer‘de râfi‘ü’r-rakīm Dimitraki v. Yorgi nâm zimmî muvâcehesinde ikrâr ve i‘tirâf edip akd-i âti’z-zikrin sudûruna değin üç sehimde iki sehimi benim ve bir sehimi hemşîrem mezbûre Ayni Hâtun’un silk-i mülk-i sahîhimde münselik olan emlâk-i mevrûsemizden karye-i mezbûrede vâki‘ bir tarafı Dimitraki mülkü ve bir tarafı Kostantin mülkü ve bir tarafı Aleksandra mülkü ve bir tarafı tarîk-i âm ile mahdûd iki bâb fevkānî oda ve bir ahır ve eşcâr-ı müsmire ve gayr-ı müsmire bahçeyi muhtevî menzilden mülk-i mevrûsum olan üç sehimde iki sehim hisse-i şer‘iyye-i şâyi‘amı ve yine karye-i mezbûre nehri üzerinde dâir Mehmed Çavuş ile müşterek bir göz mülk değirmende olan on sehimden yedi sehim hissemi ve otuz beş dut eşcârında olan iki sehim hissemi mezbûre Dimitraki’ye otuz esedî guruşa bey‘ ve teslîm-i bâtt-ı sahîh ile bey‘ ve teslîm edip ol dahi vech-i muharrer üzre iştirâ ve kabûl eyleyip ve yine tefvîz-i âtî sudûruna değin karye-i mezbûrede vâki‘ tahmînen iki yüz kırk keyl tohum isti‘âb eder tarlaların dahi tasarruflarını sâhib-i arz ma‘rifetiyle on esedî guruş bedel mukābelesinde mezbûr Dimitraki’ye tefvîz bi’l-ferâğ eylediğimde ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an kırk esedî guruş yedinden bi’t-tamâm ve’l-kemâl ahz u kabz eyledim min ba‘d alâka ve medhalim yoktur emlâk-i mezbûre ve arâzi-i merkūmeyi mahallinde zabt ve tasarrufa dahi tarafımdan mezbûr Dimitraki’ye taslît eyledim dedikde gıbbe’t-tasdîk kayd şud. Fî 5 min Zilka‘de sene [10]81. Şuhûdü’l-hâl: Mahmud Ağa b. Sinan, Ahmed b. Şaban, Mahmud b. Mehmed, Hasan b. Ali, Hüseyin b. Hasan.