Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 150 Hüküm no: 175 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi b. Mahmud’un evini Hammad Çelebi b. İsmail’e bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Evlice Baba mahallesinde sâkin Abdi b. Mahmud meclis-i şer‘de râfi‘ü’r-rakīm Hammad Çelebi b. İsmail mahzarında ikrâr edip silk-i mülk-i sahîhimde münselik emlâkimden mahalle-i mezbûrede vâki‘ bir tarafı Hayreddin oğlu mülkü ve bir tarafı imâma meşrûta vakıf menzil ve bir tarafı Mumcu Mehmed Çelebi mülkü ve bir tarafı tarîk-i âm ile mahdûd iki beyt-i süflî ve zât-ı eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘ ve levâhıkı ile mezbûr Hammad Çelebi’ye üç bin fıddî râyicü’l-vakt akçeye bi tarîki’l-istiğlâl bey‘ ve teslîm ol dahi vech-i muharrer üzre iştirâ ve kabûl ve kabz-ı semen-i ma‘dûd ve teslîm-i mebî‘-i mahdûd kıldığımdan sonra yine mezbûr Hammad Çelebi menzil-i mahdûd-ı mezkûru ba‘de’t-tahliye târih-i kitâbdan bir sene tamâmına değin üç yüz altmış akçeye bana îcâr ve teslîm ve ben dahi istîcâr ve tesellüm ve kabûl eyledim dedikde gıbbe’t-tasdîk mâ hüve’l-vâki‘ kayd şud. Fî 5 min Zilka‘de sene [10]81. Şuhûdü’l-hâl: Mehmed Çelebi, Hasan Çelebi b. Mehmed, İbrahim b. Bayram, Mustafa b. Ahmed, Hasan b. Ali, Mehmed b. Mahmud, Hasan b. Abdullah, Mustafa Efendi el-Kâtib.