Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 152 Hüküm no: 178 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Mustafa’nın hastalıklı olduğu iddiasıyla Yusuf b. Veli’den aldığı Timurhan adlı câriyeyi iade talebinin reddi Mahmiye-i İstanbul’da Ayasofya semtinde Üskübî mahallesinde sâkin Ali Çelebi b. Mustafa nâm şâbb-ı emred mahfil-i kazâda medîne-i Hazret-i Ebâ Eyyûb el-Ensârî’de hallâk tâifesinden işbu hâmilü’l-kitâb Üstâd Yusuf b. Veli nâm kimesne mahzarında üzerine takrîr-i da‘vâ edip işbu hâzır bi’l-meclis orta boylu, açık kaşlı, elâ gözlü Rûsiyyetü’l-asl Timurhan bt. Abdullah nâm câriyeyi târih-i kitâbdan kırk gün mukaddem doksan yedi buçuk esedî guruşa hâzır bi’l-meclis birâderim Abdülhalim Çelebi nâm sagīr için merkūm Üstâd Yusuf’dan iştirâ edip istihdâm üzre iken târih-i kitâbdan on gün mukaddem câriye-i mezkûrenin elleri üzerinde ve ayaklarında tuzlu balgam ayb-ı kadîmine muttalî‘ olup hâlâ câriye-i mezbûreyi merkūm Üstâd Yusuf’a red ve semeni olan meblağ-ı mârrü’z-zikr doksan yedi buçuk esedî guruşu taleb eylediğimde câriye-i mezbûreyi kabûl ve semenini teslîmden imtinâ‘ eder suâl olunsun deyicek gıbbe’s-suâl mezbûr Üstâd Yusuf cevâbında câriye-i mevsûfe-i mezbûreyi târih-i mezbûrde zikr olunan ayıbıyla müdde‘î-i mezbûr Ali Çelebi’nin kendisine semen-i mezkûra bey‘ ve teslîm ve yedinden doksan yedi buçuk esedî guruşu ahz u kabz eylemişdir ve ondan mâ‘adâ müdde‘î-i mezbûrun kendi kavli ile câriye-i mezbûrenin ayıbına mutallî‘ olalı on gündür ki istihdâm eder, binâen alâ zâlik câriye-i mezbûreyi kabûl etmezim deyicek isre’l-istintâk merkūm Ali Çelebi câriye-i mezbûreyi kendi nefsi için iştirâ eylediğini ve ayb-ı mezkûruna muttalî‘ oldukdan sonra istihdâm eylediğini inkâr ile cevâb vericek merkūm Üstâd Yusuf’dan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin merkūm Ali Çelebi’ye evvelâ câriye-i mezbûreyi kendi nefsi için semen-i mezkûra iştirâ etmediğine ve ayb-ı mezkûruna muttalî‘ oldukdan sonra on gün mikdârı istihdâm etmediğine ve ayb-ı mezkûra ilaç ve devâ etmeyip kendiden câriye-i mezbûreyi ayb-ı mezbûreyle kabûlünü delâlet eder fi‘l sâdır olmadığına yemîn teklîf olundukda her biri için bi’d-defâ‘at yemînden nükûl etmeğin merkūm Ali Çelebi’ye bî-vech ta‘arruzdan men‘ birle mâ cerâ bi’l-ibtigā sebt ve imlâ ve merkūm Üstâd Yusuf yedine hâzihi’l-hurûf def‘ ve i‘tâ olundu. Fi’s-sânî ve’l-ışrîn min Zilka‘de sene [10]81. Şuhûdü’l-hâl: Mehmed Bey sâkin-i İstanbul, Eyüb Çelebi b. Mehmed el-müsta‘id, Himmet Çelebi b. Yusuf, Ahmed Efendi b. Sefer, Üstâd Aslan b. Abdullah Hallâk, Mehmed b. Mahmud.