Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 153 Hüküm no: 179 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasil v. Nikola’nın yarı hissesine sahip olduğu değirmeni Nikola ve Zimo’ya sattığı Vilâyet-i Rumeli’nde cezîre-i Mora aktâ‘ından Kalavrite kazâsına tâbi‘ Klayahor nâm karye zimmîlerinden Vasil v. Nikola nâm zimmî mahfil-i kazâda ve mahall-i hüküm ve imzâda sâhibü’l-vesîka Nikola v. Todoraki ve Zimo v. Kosta nâm zimmîler muvâcehesinde ikrâr ve takrîr-i kelâm edip karye-i mezbûre sınırı dâhilinde Kalokarya nâm mevzi‘de vâki‘ dere suyu üzerinde dâir nısfı işbu hazır bi’l-meclis Trandafilo nâm zimmînin ve nısf-ı âharı benim mülküm olan tahdîd ve tavsîfden müstağni değirmende benim mülküm olan nısf hisse-i şâyi‘amı cemî‘ tevâbi‘ ve levâhıkı ile beş bin fıddî râyicü’l-vakt akçeye mezbûrân Nikola ve Zimo’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm onlar dahi ale’l-iştirâki’s-seviy alıp iştirâ ve kabûl eylediklerinden sonra semeni olan mezbûrü’n-na‘t beş bin akçeyi müşteriyân-ı mezbûrândan tamâmen ahz u kabz edip mârrü’z-zikr nısf değirmeni mahallinde zabt ve tasarrufa merkūmân Nikola ve Dimitri’yi taslît eyledim mârrü’z-zikr nısf değirmen de min ba‘d merkūmânın ale’l-iştirâki’s-seviy mülk-i mahz-ı müşterâlarıdır. Keyfe mâ yeşâ’ ve yahtâr mutasarrıf olsunlar dedikde gıbbe’t-tasdîk kayd şud. Fî 22 min Zilka‘de sene [10]81. Şuhûdü’l-hâl: Ahmed Beşe b. Mehmed Çukadâr, Mehmed b. Mahmud, Hüseyin b. Hasan, Ali b. Abdullah, Nikola v. Yorgi, Velisar v. Todori, İstati v. Mısırlı, Teohani v. Dimo, Andon v. Manol.