Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 156 Hüküm no: 185 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Himmet’in veresesi arasında çıkan anlaşmazlığın sulh ile hallolunduğu Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de Takyecibaşı mahallesi sâkinlerinden iken bundan akdem vefât eden İplikçi el-Hâc Mustafa b. Himmet’in verâseti sulbî kebîr oğlu Hüseyin Çelebi ile sulbiye-i kebîre kızları Ayşe ve Fâtıma ve Râbia nâm hâtunlara münhasıra olduğu şer‘an zâhir ve müte‘ayyin oldukdan sonra mezbûre Fâtıma Hâtun tarafından husûs-ı âti’z-zikre vekîl olup vekâleti mezbûrenin zâtını ma‘rifet-i şer‘iyye ile ârifûn olan Ahmed Çelebi b. Ali ve Mehmed Beşe b. İbrahim ve Yusuf Dede b. Hasan şehâdetleri ile sâbite olan Hamza b. Abdülkerim meclis-i şer‘de işbu sâhibü’l-kitâb mezbûr Hüseyin Çelebi mahzarında bi’l-vekâle ve bi’l-asâle ikrâr-ı tâm ve takrîr-i kelâm edip müvekkilem mezbûre Fâtıma Hâtun’un mûrisi babası müteveffâ-yı mezbûr el-Hâc Mustafa’nın muhallefâtını verese-i mezbûre beyinlerinde iktisâm murâd eylediklerinde oğlu mezbûr Hüseyin Çelebi müvekkilem mezbûre Fâtıma Hâtun hissesine isâbet eden eşyânın ekserini ketm ile cevâb vermeğin beyinlerinde münâza‘ât-ı kesîre ve muhâsamât-ı adîde vaka‘a olmuşdu, el-hâletü hâzihî müvekkilem mezbûre Fâtıma Hâtun’un birâderi mezbûr Hüseyin Çelebi ile beyinlerinde muslihûn tavassut edip müvekkilem mezbûre Fâtıma Hâtun’u babası müteveffâ-yı mezbûrun mecmû‘ muhallefâtından kendisine isâbet eden hisse-i şer‘iyyesi da‘vâsından birâderi mezbûr Hüseyin Çelebi ile mevâni‘den ârî şerâit-i sıhhat-i sulhu hâvî, tehârüc-i şer‘î vechi üzre beş yüz kıt‘a esedî guruş üzre inşâ-i akd-i sulh eylediklerinde müvekkilem mezbûre Fâtıma dahi sulh-ı mezbûru kabûl ve bedel-i sulh olan mezbûrü’n-na‘t beş yüz esedî guruşu müvekkilem mezbûre Fâtıma birâderi mezbûrdan tamâmen ahz u kabz edip husûs-ı mezbûra müte‘allika âmme-i da‘vâdan ve mütâlebâtdan birâderim mezbûr Hüseyin Çelebi’nin zimmetini ibrâ ve iskāt eyledim min ba‘d birâderim mezbûr Hüseyin Çelebi ile vechen mine’l-vücûh da‘vâ ve nizâ‘ım yoktur dedi deyicek gıbbe’t-tasdîk kayd şud. Fî 23 min Zilka‘de sene [10]81. Şuhûdü’l-hâl: Es-Sâbikūn.