Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 157 Hüküm no: 186 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Himmet’in veresesi arasında çıkan anlaşmazlığın sulh ile hallolunduğu Medîne-i Hazret-i Ebâ Eyyûb el-Ensârî’de Takyecibaşı mahallesi sâkinlerinden iken bundan akdem vefât eden İplikçi el-Hâc Mustafa b. Himmet’in verâseti sulbî kebîr oğlu Hüseyin ile sulbiye kebîre kızları Ayşe ve Fâtıma ve Râbia nâm hâtunlara münhasıra olduğu şer‘an sâbit oldukdan sonra mezbûre Râbia Hâtun tarafından husûs-ı âti’z-zikre vekîl olup vekâleti mezbûrenin zâtını ma‘rifet-i şer‘iyye ile ârifûn olan Ahmed Çelebi b. Ali ve Mehmed Beşe b. İbrahim ve Yusuf Dede b. Hasan şehâdetleri ile şer‘an sâbite olan Hamza b. Abdülkerim meclis-i şer‘de işbu sâhibü’l-kitâb mezbûr Hüseyin Çelebi mahzarında bi’l-vekâle ve bi’l-asâle ikrâr ve takrîr-i kelâm edip müvekkilem mezbûre Râbia Hâtun’un mûrisi babası müteveffâ-yı mezbûr el-Hâc Mustafa’nın muhallefâtını verese-i mezbûre beynlerinde iktisâm murâd eylediklerinde oğlu mezbûr Hüseyin Çelebi müvekkilem mezbûre Râbia Hâtun hissesine isâbet eden eşyânın ekserini ketm ile cevâb vermeğin beynlerinde münâza‘ât-ı kesîre [ve] muhâsamât-ı ekîde vâkı‘a olmuşdu, el-hâletü hâzihî müvekkilem mezbûre Râbia Hâtun ile birâderi mezbûr Hüseyin Çelebi beynlerinde muslihûn tavassut edip müvekkilem mezbûre Râbia Hâtun’u babası müteveffâ-yı mezbûrun mecmû‘ muhallefâtından kendisine isâbet eden hisse-i şer‘iyyesi da‘vâsından birâderi mezbûr Hüseyin Çelebi ile mevâni‘den ârî şerâit-i sıhhat-i sulhu hâvî, tehârüc-i şer‘î vechi üzre beş yüz kıt‘a esedî guruş üzre inşâ-i akd-i sulh eylediklerinde müvekkilem mezbûre Râbia Hâtun dahi sulh-ı mezbûru kabûl ve bedel-i sulh olan mezbûrü’n-na‘t beş yüz esedî guruşu müvekkilem mezbûre Râbia birâderi mezbûr Hüseyin Çelebi yedinden tamâmen alıp kabz edip husûs-ı mezbûra müte‘allika âmme-i de‘âvî ve mütâlebâtdan birâderim mezbûr Hüseyin Çelebi’nin zimmetini ibrâ ve iskāt eyledim min ba‘d birâderim mezbûr Hüseyin Çelebi ile vechen mine’l-vücûh da‘vâ ve nizâ‘ım yoktur dedi deyicek gıbbe’t-tasdîk kayd şud. Fî 23 min Zilka‘de sene [10]81. Şuhûdü’l-hâl: Es-Sâbikūn.