Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 161 Hüküm no: 191 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed’in mirası olan evin vârislerce Hasan b. Abdullah’a satıldığı Havâss-ı Refî‘a kazâsı muzâfâtından Terkos nâhiyesine tâbi‘ Harâçcı nâm karyede sâkin iken bundan akdem fevt olan Pîr Mehmed’in verâseti kebîr oğlu Mehmed ile sulbiye kebîre kızları Fâtıma ve Ayşe ve Gevher Han nâm hâtunlara münhasıra idiği şer‘an zâhir ve müte‘ayyin oldukdan sonra merkūm Mehmed ve mezbûretân Fâtıma ve Ayşe ve Gevher Han meclis-i şer‘de işbu râfi‘ü’l-kitâb Hasan b. Abdullah mahzarında her biri ikrâr ve takrîr-i kelâm edip mûrisimiz müteveffâ-yı mezbûrdan irs-i şer‘le bize intikāl eden emlâk-i mevrûseden karye-i mezbûrede vâki‘ bir tarafı Ali Beşe mülkü ve bir tarafı Malkoç Efendi mülk bağı ve tarafeyni tarîk-i âm ile mahdûd bir bâb tahtânî oda ve cüneyne ve zât-ı eşcâr-ı müsmire ve gayr-ı müsmire ve kenîfi müştemil mülk-i mevrûs menzilimizi bi cümleti’t-tevâbi‘ ve’l-levâhık merkūm Hasan’a iki bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile her birimiz bey‘ ve teslîm ol dahi minvâl-i muharrer üzre iştirâ ve tesellüm ve kabûl ve kabz edip semeni olan mesfûrü’n-na‘t iki bin beş yüz akçeden her birimize isâbet eden hissemizi müşterî-i mezbûr Hasan yedinden tamâmen alıp, kabz edip menzil-i mahdûd-ı mezkûrda alâka ve medhalimiz yoktur min ba‘d mezbûr Hasan’ın mülk-i müşterâsıdır mutasarrıf olsun dediklerinde kayd şud. Fî selhi Şevvâli’l-mükerrem sene [10]81. Şuhûdü’l-hâl: Ahmed Beşe Çukadâr, Hasan b. Abdullah, Eyüb Efendi el-müsta‘id, Mustafa Efendi el-Müderris, Mehmed Beşe b. Mahmud.