Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 160 Hüküm no: 190 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüp Sultan Vakfı için zabt olunan Meno v. Kosta’ya ait muhallefâtın vereseye iadesi Fi’l-asl Vilâyet-i Rumeli’nde Yenişehir kazâsı a‘mâlinden Platomana nâhiyesine tâbi‘ Anbelâki nâm karye zimmîlerinden olup medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de vâki‘ debbâğhânede mütemekkin olan bâ‘isü’l-vesîka Meno v. Kosta nâm zimmî mahmiye-i hazret-i müşârun-ileyh evkāfına bi’l-fi‘l mütevellî olan iftihârü’l-emâcid ve’l-e‘âlî Ali Ağa kıbelinden husûs-ı âti’z-zikre vekîl-i şer‘î ve bâ-berât-ı şerîf-i âlîşân medîne-i mezbûrede vâki‘ beytülmâl-i âmme ve hâssa-yı vakf-ı şerîf için kabz ve mütevellî-i mezbûra teslîme emîn ve me’mûr olan Ahmed Çelebi b. Mehmed mahzarında üzerine takrîr-i da‘vâ edip fi’l-asl karye-i mezbûreden olup medîne-i mezbûre iskelesinde kayıkçı iken bundan akdem mürd olan [Ya]ni v. Kosta nâm zimmînin vâlidesi Zafira benim babam Yani ile li eb ve üm karındaşlardır zîrâ babaları ismi Aleksi, anaları ismi Bolomo, maskat-ı re’sleri karye-i mezbûre olup yalnız mezbûrun verâseti bana münhasıra olup benden gayri vârisi olmadığın hâlik-i mezbûr lede’ş-şuhûd ikrâr edip musırran alâ hâzihi’l-ikrâr mürd olmuş iken emîn-i mezbûr Ahmed Çelebi hâlik-i mezbûrun vârisi olmamak zu‘muyla mecmû‘ metrûkâta vaz‘-ı yed edip verâsetim hasebiyle taleb eylediğimde teslîmde ta‘allül eder, hâlâ suâl olunup ber mûceb-i defter mûrisim hâlik-i mezbûrun kabz eylediği metrûkâtı bana teslîme vekîl-i mezbûra tenbîh olunmak matlûbumdur deyicek gıbbe’s-suâl vekîl-i mezbûr Ahmed Çelebi cevâbında medîne-i mezbûrede vâki‘ beytülmâl-i âmme ve hâssa-i hazret-i müşârun-ileyh evkāfına hâsıl kayd olunmağla hâlik-i mezbûrun metrûkâtı müvekkilim, mütevellî-i mezbûr Ali Ağa tarafından vakf-ı şerîf için bi’l-vekâle alıp kabz eylemişdir deyû ikrârında müdde‘î-i mezbûrun ber minvâl-i meşrûh verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden medîne-i mezbûrede Cebecibaşı mahallesi sâkinlerinden Hüseyin Çelebi b. Hasan ve kayıkçılar Kethüdâsı Davud Beşe b. Veli ve Süleyman Beşe b. Cafer nâm kimesneler li ecli’ş-şehâde makām-ı kazâya hâzırûn olup istişhâd olunduklarında fi’l-vâki‘ hâlik-i mezbûr bizim huzûrumuzda müdde‘î-i merkūm için babamın li eb ve üm kız karındaşı oğlu ve zî-rahm cihetinden vârisimdir ve verâsetim merkūm Hıristo’ya münhasırdır, vâris-i âharım yoktur deyû ikrâr ve bizi işhâd [ve] ikrâr-ı mezkûr üzerine musırran mürd oldu, biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm metrûkât-ı hâlik-i mezbûrdan vekîl-i mezbûrun kasr-ı yedine tenbîh birle mâ vaka‘a kayd şud. Fî 28 Şevvâl sene [10]81. Şuhûdü’l-hâl: Mehmed b. Mahmud, Salih b. Mehmed, Mustafa Çelebi b. İsmail, Hüseyin b. Ali, Mustafa b. Süleyman, Mehmed b. Ahmed.