Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 162 Hüküm no: 194 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mahmud’un alacağı olan paranın kefil olan İbrahim Çelebi tarafından ödenmesi için mahkemece yapılan tembih Hazret-i Ebâ Eyyûb’de Fethi Çelebi mahallesi sâkinlerinden işbu râfi‘ü’l-vesîka Hüseyin b. Mahmud nâm kimesne meclis-i şer‘de Balabanzâde İbrahim Çelebi b. Mehmed mahzarında üzerine takrîr-i da‘vâ edip Havâss-ı aliyye kazâsına tâbi‘ Ayayorgi nâm karye zimmîlerinden Nikola v. Kiro ve Hıristo v. Nikola ve Apostol v. İstemad ve Yanaki v. Andriye ve Manol v. Anastaş ve Yamandi v. Zafiri ve Hersen v. Andron nâm zimmîler târih-i kitâbdan bir sene mukaddem istikrâz ve kabz eyledikleri iki yüz elli kıt‘a esedî guruşa merkūm İbrahim Beşe kefîl ve zâmin olmağla hâlâ mârrü’z-zikr iki yüz elli esedî guruş merkūm İbrahim Beşe’den kefâletine binâen taleb eylediğimde teslîmden imtinâ‘ eder suâl olunup alıverilmek matlûbumdur dedikde gıbbe’s-suâl mezbûr İbrahim Beşe cevâbında fi’l-vâki‘ merkūmûn zimmîlerin müdde‘î-i mezbûrdan ber minvâl-i muharrer istikrâz ve kabz eyledikleri iki yüz elli kıt‘a esedî guruşa müdde‘î-i mezbûra edâ ve teslîme kefîl ve zâmin olmuşumdur deyû bi tav‘ihî ikrâr ve i‘tirâf etmeğin alâ mûcibi i‘tirâfihî iki yüz elli esedî guruşa gıbbe’l-kefâle müdde‘î-i mezbûra edâ ve teslîme mezbûr İbrahim’e ilzâm olunup kayd şud. Fî 2 min Zilka‘de sene [10]81. Şuhûdü’l-hâl: Mehmed Efendi b. İbrahim el-İmâm, Ahmed Halîfe b. Receb el-Müezzin, Hüseyin Çelebi b. Mustafa, Hüseyin b. Hasan, Eyüb Efendi, Mehmed [b.] Mahmud, Ahmed Çukadâr, Ali b. Hasan, Hasan b. Abdullah.