Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 163 Hüküm no: 195 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Şaban’ın eski kocası Mustafa Ağa b. Mehmed’de olan alacaklarını tamamen alıp sulh oldukları Medîne-i Hazret-i Ebâ Eyyûb el-Ensârî -aleyhi rıdvâni’l-Bârî-de Silâhî Mehmed Bey mahallesi sâkinlerinden Hatice bt. Şaban nâm hâtun meclis-i şer‘de sâbıkan zevci olan işbu sâhibü’l-kitâb Yedekçi el-Hâc Mustafa Ağa b. Mehmed mahzarında bi tav‘ihâ ikrâr ve takrîr-i kelâm edip mezbûr el-Hâc Mustafa Ağa bundan akdem zevcim iken benden istikrâz ve kabz eylediği iki bin akçeyi ve yedimden gasb eylediği üç bin akçe kıymetli bir altın cebe bileziğimi ve yedi aded çatma Bursa yastığımı ve yine mezbûrun firâşından hâsıl edip ile’l-ân bi hükmi’l-hızâne hacr ve terbiyemde olan Emrullah nâm sagīre kızımın beher yevm nafaka-i mefrûza-i müstedânesinden üç senede müctemi‘a altı bin dört yüz seksen akçeyi zevc-i sâbıkım mezbûr el-Hâc Mustafa Ağa’dan taleb eylediğimde inkâr ile cevâb vermeğin beynimizde münâza‘ât-ı kesîre ve muhâsamât-ı adîde vâkı‘a olmuşdu, el-hâletü hâzihî beynimizde muslihûn tavassut edip zevc-i sâbıkım mezbûr el-Hâc Mustafa Ağa ile da‘vâ-yı mezbûremden beni kırk kıt‘a esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan mezbûrü[’n-na‘t] kırk kıt‘a esedî guruşu zevc-i sâbıkım mezbûr el-Hâc Mustafa Ağa’dan tamâmen alıp kabz edip husûs-ı mezbûra müte‘allik âmme-i de‘âvî ve mütâlebâtdan mezbûr el-Hâc Mustafa Ağa zimmetini ibrâ ve iskāt eyledim, min ba‘d mûmâ-ileyh ile vechen mine’l-vücûh da‘vâ ve nizâ‘ım yoktur deyicek gıbbe’t-tasdîk kayd şud. Fî 3 min Zilka‘de sene [10]81. Şuhûdü’l-hâl: Yusuf Çelebi b. Zeynelâbidin, İbrahim Halîfe Ahmed, Ali Halîfe b. Halil, Ahmed Beşe b. Mehmed, Eyüb Efendi, Salih Efendi.