Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 170 Hüküm no: 202 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Hasan’ın evini Ayşe Hatun’a bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -radiye anhu Rabbühü’l-Bâri-de Takyecibaşı mahallesi sâkinlerinden Mustafa Beşe b. Hasan meclis-i şer‘de işbu bâ‘isü’l-kitâb Ayşe Hâtun tarafından husûs-ı âti’z-zikre vekîl olup vekâleti ber nehc-i mu‘teber şer‘an vekâleti sâbite olan umdetü erbâbü’t-tahrîr ve’l-kalem Mehmed Efendi b. Mehmed nâm vekîl mahzarında ikrâr ve takrîr-i kelâm edip emlâkimden mahalle-i mezbûrede vâki‘ bir tarafı Ahmed Paşazâde Abdülbâkī Bey ve bir tarafı Mehmed Ağa veresesi mülkü ve bir tarafı ba‘zan Şeyh Hızırzâde Mehmed Çelebi mülkü ve ba‘zan Çömlekçi Durmuş Beşe mülkü ve bir tarafı tarîk-i âm ile mahdûd dört bâb fevkānî ve iki bâb tahtânî oda ve bi’r-i mâ ve zât-ı eşcâr-ı müsmire ve gayr-ı müsmire bahçe ve kenîfi müştemil mülk menzilimi bi cümleti’t-tevâbi‘ müvekkile-i mezbûre Ayşe Hâtun’a üç yüz esedî guruşa alâ tarîki’l-istiğlâl bey‘ ve teslîm, ol dahi tarîk-i mezbûr üzre iştirâ ve tesellüm ve kabûl ve ba‘de’t-tahliye ve’t-tekābuz târih-i kitâbdan bir sene tamâmına değin üç bin altı yüz akçe icâre ile menzil-i mezbûr, müvekkile-i mezbûreye îcâr ve teslîm, ben dahi vech-i muharrer üzre istîcâr ve tesellüm ve kabûl eyledim dedikde mâ vaka‘a kayd şud. Fî selhi Zilka‘de sene [10]81. Şuhûdü’l-hâl: Mehmed Çelebi b. Veli Câbi-i Sultan Bayezid, Ömer Efendi b. İvaz, Mustafa Çelebi b. Mehmed Abacızâde, Mustafa Çelebi b. Ömer ve gayruhüm.