Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 169 Hüküm no: 201 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ahmed’in mülk menzilini Saime bt. Ahmed’e sattığı Medîne-i Hazret-i Ebâ Eyyûb el-Ensârî -radiye anhu Rabbühü’l-Bâri-de Nişâncı Paşa mahallesinde sâkine Ayşe bt. Ahmed nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Osman Dede b. Ahmed ve Mustafa Çelebi b. Musa şehâdetleriyle şer‘an vekâleti sâbite olan babası mezbûr Ahmed meclis-i şer‘de Sâime bt. Ahmed tarafından tasdîka vekîl olup vekâleti nehc-i şer‘î-i mu‘teber üzre sâbite olan zevci Mahmud b. Abdullah mahzarında bi’l-vekâle ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden yine medîne-i mezkûre mahallâtından Çavuş Kasım mahallesinde vâki‘ bir tarafı Halil Çelebi mülkü ve iki tarafı Ebû Bekir dâmâdı Mehmed Bey mülkü ve bir tarafı tarîk-i âm ile mahdûd fevkānî ve tahtânî iki bâb odaları ve sundurma ve Mehmed Bey ile müşterek bi’r-i mâ ve zât-ı eşcâr-ı müsmire ve gayr-ı müsmire bahçeyi ve hudûd-ı mezkûr hâricinde vâki‘ tûlen beş ve arzan iki zirâ‘ kapı yeri ile mahdûd mülk menzilini cemî‘ tevâbi‘ ve levâhıkı ile müvekkile-i mezbûre Sâime Hâtun’a on bin beş yüz fıddî râyic-i fi’l-vakt akçeye tarafeynden îcâb ve kabûlü hâvî, bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr on bin beş yüz akçeyi yedinden bi’t-tamâm ahz u kabz edip menzil-i mahdûd-ı mezkûrda alâka ve medhalim yoktur, müvekkile-i mezbûre Sâime Hâtun’un mülk-i müşterâsı olmuşdur Keyfe mâ yeşâ’ ve yahtâr mutasarrıf olsun deyicek kayd şud. Fî 28 min Zilka‘de sene [10]81. Şuhûdü’l-hâl: Hasan b. Yusuf, Ahmed Beşe Çukadâr, Hasan b. Ali, Osman, Hasan b. Abdullah.