Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 171 Hüküm no: 204 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Markos v. Arzuman’ın Osat v. Mehram’da olan alacağının muslihûn tavassutu ile halli Ermeni tâifesinden Margos v. Arzuman meclis-i şer‘de yine tâife-i mezbûreden işbu hâmilü’l-vesîka Osat v. Mehram muvâcehesinde ikrâr ve takrîr-i kelâm edip merkūm Osat zimmetinde min ciheti’l-karzi’ş-şer‘î bin yedi yüz akçe hakkım olup taleb eylediğimde inkâr ile cevâb vermeğin isbât sadedinde iken beynimize muslihûn tavassut edip sâlifü’z-zikr bin yedi yüz akçe da‘vâsından merkūm Osat ile bin fıddî nakd-i râyic fi’l-vakt akçe üzerine beni inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan mezbûrü’n-na‘t bin akçeyi mesfûr Osat yedinden tamâmen alıp, kabz edip husûs-ı mezbûra müte‘allika cemî‘ de‘âvî ve mütâlebâtdan merkūm Osat’ın zimmetini ibrâ ve iskāt eyledim dedikde gıbbe’t-tasdîk kayd şud. Fî 28 min Zilka‘de sene [10]81. Şuhûdü’l-hâl: Hüseyin Çelebi b. Ali, Hasan b. Abdullah, Ali b. Abdullah, Ahmed Beşe Çukadâr, Musa Çelebi b. Huddâm.