Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 172 Hüküm no: 205 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zimmîlerden alınacak cizyelerin miktarı ve tahsil zamanlarının tuğralı cizye defterlerindeki esaslara göre yapılıp kimseye haksızlık yapılmaması Hâssa-i İstanbul ve Havâs defterinden ifrâz-ı kefere tâifesinin bin [seksen] bir Ramazân-ı şerîfi gurresinden bin seksen iki Şa‘bân’ı gâyetine değin uhdelerine edâsı lâzım gelen cizyeleri cem‘ ve tahsîl olunmak ( ) der-uhde olunup eline tuğralı ve nişânlı cizye defteri sûreti verilmeğin mûcebince vakt u zamânıyla tahsîl ve teslîm-i cizye ettirmek emrim ve buyurdum ki hükm-i şerîfim vardıkda siz ki kadılarsız hâshâ-i İstanbul defteri keferesinin iki bin üç yüz yetmiş bir cizye hâneleri olup târih-i mezbûra mahsûb olmak üzre iki bin iki yüz otuz bir hânesinden ikişer yüz ellişer ve yüz kırk mu‘âf hânesinden ikişer yüz seksener akçe ve ifrâz-ı Havâs defteri keferesinin yedi yüz otuz yedi hânelerinden ikişer yüz ellişer akçe cizyeleri ve hâne başına kırk akçe mîrî ulûfeleri irsâl olunan tuğralı ve nişânlı cizye defterleri mûcebince cem‘ ve tahsîl ettirip kimesneye ta‘allül ve nizâ‘ ettirmiyesiz ve bundan mâ‘adâ cihet-i mu‘ayyene için ol mikdâr cizye hânelerinin her birine hânesinden kırkar akçe dahi aldırıp bundan ziyâde bir akçe almaya ve aldırmayasız ve cizye için olunan kâmil her guruşu hazîne-i âmire aldığı üzre ikişer akçe noksanıyla aldırıp ziyâde ve noksan aldırmayasız ve akçe alındıkda hâlisü’l-ayâr akçe aldırıp züyûf ve kızıl ve kırık akçe aldırmayasız ve cizye-i mezbûre için bin seksen Şa‘bânı’nın birinci gününden tefâvütden gayri doksan sekiz bin üç yüz akçe ve yine sene-i mezbûre Ramazân-ı şerîfi gurresinden tefâvütden gayri kırk dokuz bin üç yüz akçe ve yine sene-i mezbûr Şevvâli’nin on birinci gününden tefâvütden gayri kırk dokuz bin üç yüz akçe ve yine mâh-ı mezbûrun yirmi üçüncü günü tefâvütden gayri kırk dokuz bin üç yüz akçe ki cem‘an tefâvütden gayri iki yük doksan beş bin sekiz yüz akçe ve yine ber vech-i peşîn teslîm-i ciz[ye] olmuşdur kesr ve noksan-ı defterden ve naks-ı cizyeden hilâf-ı emr ve defter zulüm ve ta‘addî ettirmiyesiz şöyle bilesiz, alâmet-i şerîfe i‘timâd kılasız. Fi’l-yevmi’r-râbi‘-i aşer şehr-i Zilhicce sene semânîn ve elf. Be yurd-ı Kal‘a-i Kandiye