Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 173 Hüküm no: 207 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hicrî 1080 yılına ait muhtelif vergiler ve tahsil şartları Vech-i tahrîr-i hurûf oldur ki Mahrûse-i İstanbul’da vâki‘ cennet-mekân firdevs-âşiyân merhûm ve mağfûrun-leh Ebü’l-feth Sultan Mehmed Han Gāzi -tâbe serâhû- hazretlerinin câmi‘-i şerîf ve imâret-i âmireleri evkāf-ı şerîfi mukāta‘alarından vilâyet-i Rumeli’nde vâki‘ Terkos ve tevâbi‘i mukāta‘asının senesin maktû‘-ı kadîmî iki yük akçe olup işbu bin seksen bir Mart’ı ibtidâsından bir sene tamâmına değin zabt etmek üzre işbu bâ‘isü’l-kitâb kıdvetü’l-emâsil ve’l-akrân Hasan Ağa -zîde kadruhû- tâlib ve râğıb olup mukāta‘a-i mezbûr, sene-i mezkûre mahsûb olmak üzre müşârun-ileyh der-uhde ve iltizâm olunup kadîminden cânib-i vakf-ı şerîfe âid ve râci‘ olan a‘şâr-ı şer‘iyye ve rüsûm-ı örfiyye ve cürm ü cinâyet ve bâd-ı hevâ ve yava ve kaçgun ve resm-i bâğ[â]t, öşr-i bostan ve öşr-i kovan ve resm-i çayır ve öşr-i meyve ve tapu-yı zemîn ve resm-i arûsâne ve mâl-ı gāib ve mâl-ı mefkūd ve beytülmâl-i âmme ve hâssa ve kul ve câriye müjdegânesi ve aynî müteveccihâtı hukūk ve rüsûm-ı şer‘iyye ve örfiyye ve evkāf-ı şerîf-i selâtîn min külli’l-vücûh maktû‘ü’l-kadem ve mefrûzü’l-kalem serbest olup ümenâsına teveccüh zabtı vâki‘ olan mahsûlât ahz u kabz edegelmişler iken müşârun-ileyh dahi ol vechile zabt edip ve meblağ-ı mezbûr iki yük akçe senesi için hesâbı üzre cânib-i vakf-ı şerîfe edâ ve teslîm etmek şartıyla taraf-ı âhardan bir vechile dahl etmiyeler deyû tevliyyetim hasebiyle işbu hurûf ketb olundu. Tahrîren fî evâsıt-ı şehri Şa‘bân sene semânîn ve elf. Ali el-Mütevellî