Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 172 Hüküm no: 206 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Hasan’ın evini Ayşe Hatun’a bey‘ bi’l-istiğlâl usulüyle satması Medîne-i Hazret-i Ebâ Eyyûb el-Ensârî’de Takyeci Başı mahallesi sâkinlerinden Mustafa Beşe b. Hasan meclis-i şer‘de işbu bâ‘isetü’l-kitâb Ayşe Hâtun tarafından husûs-ı âti’z-zikre vekîl olup ber nehc-i mu‘teber şer‘î-i mu‘teber şer‘an vekâleti sâbite olan umdetü erbâbü’t-tahrîr ve’l-kalem, zübdetü ashâbi’t-tastîr ve’l-kalem Mehmed Efendi b. Mehmed nâm vekîl mahzarında ikrâr ve takrîr-i kelâm edip emlâkimden mahalle-i mezbûrede vâki‘ bir tarafı Ahmed Paşazâde Abdülbâkī Çelebi mülkü ve bir tarafı Mehmed Ağa veresesi mülkü ve bir tarafı ba‘zan Şeyh Hızırzâde Mehmed Çelebi mülkü ve ba‘zan Çömlekçi Durmuş mülkü ve bir tarafı Arabzâde Mehmed Çelebi mülkü ve tarîk-i âm ile mahdûd dört bâb fevkānî ve iki bâb tahtânî oda ve bi’r-i mâ ve zât-ı eşcâr-ı müsmire ve gayr-ı müsmire bahçe ve kenîfi müştemil mülk menzilimi bi cümleti’t-tevâbi‘ ve’l-levâhık müvekkile-i mezbûre Ayşe Hâtun’a üç yüz esedî guruşa alâ tarîki’l-istiğlâl bey‘ ve teslîm ol dahi tarîk-i merkūm üzre iştirâ ve tesellüm ve kabûl ve kabz edip zikr olunan üç yüz esedî guruşu tamâmen kabz eyledikden sonra müvekkile-i mezbûre menzil-i mahdûd-ı mezkûru ba‘de’t-tahliyeti’ş-şer‘iyye târih-i kitâbdan üç sene tamâmına değin beher sene üçer bin altışar yüz akçeyi ben sinîn-i mezbûrede cem‘an on bin sekiz yüz akçe icâre ile bana îcâr ve teslîm, ben dahi istîcâr ve tesellüm ve kabûl eyledim dedikde gıbbe’t-tasdîk kayd şud. Fî Selhi Zilka‘de sene [10]81. Şuhûdü’l-hâl: Mehmed Çelebi b. Veli Câbi-i Sultan Bayezid, Ömer Efendi b. İvaz, Mustafa Çelebi b. Mehmed, Mustafa b. Ömer.