Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 175 Hüküm no: 211 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçükçekmece ahalisinin menzil vergilerinin tenzil olunduğu Akzâ kuzâti’l-müslimîn, evlâ vülâti’l-muvahhidîn, ma‘denü’l-fazlı ve’l-yakīn vâris-i ulûmi’l-enbiyâi ve’l-mürselîn Mevlânâ Haslar kadısı -zîde fezâilühû- tevkī‘-i refî‘-i hümâyûn vâsıl olıcak ma‘lûm ola ki kazâ-i mezbûra tâbi‘ Küçükçekmece ahâlîsi hâlâ mahrûse-i Edirne’den Dersaâdet’ime arz u hâl gönderip bundan akdem Silivri menziline teslîmi fermânım olan menzil bârgirleri için Küçükçekmece ahâlîsinden altı yüz yirmi dört keyl şa‘îr ve iki yüz yirmi altı kantar saman havâle ve ta‘yîn olunmağla bir vechile iktidârımız yoktur deyû i‘lâm ettiklerinde menzil, tenzîl olunmağla taleb olunmaya deyû fermânım olmuşdur, buyurdum ki hükm-i şerîfimle vardıkda bu bâbda sâdır olan emrim üzre amel edip dahi menzil-i mezbûr tenzîl olunmağla mukaddemâ Küçükçekmece ahâlîsinden havâle ve ta‘yîn olunan altı yüz yirmi dört keyl şa‘îr ve iki yüz yirmi altı kantar saman talebiyle nâhiye-i mezbûre ahâlîleri[ni] rencîde ve remîde ettirmiyesiz şöyle bilesiz, alâmet-i şerîfe i‘timâd kılasız. Tahrîren fî 10 Şevvâl sene [10]81. Be makām-ı Edirne