Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 176 Hüküm no: 213 Orijinal metin no: [40a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zoma v. Niko’nun Yuvan v. Dimitri’ye olan borcunu beş adet bağını takas etmek suretiyle kapatması Vilâyet-i Rumeli’nde Gölükesri kazâsına tâbi‘ Lecişte nâm karye sâkinlerinden Zoma v. Niko nâm zimmî meclis-i şer‘-i şerîfde işbu bâ‘isü’r-rakīm Yuvan v. Dimitri muvâcehelerinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Mehmed Çelebi mülkü ve bir tarafı Atmaca mülkü ve bir tarafı Kergen nâm zimmî mülkü ve taraf-ı râbi‘i çayır ile mahdûd iki bâb tahtânî oda ve bir fırın ve bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bi cümleti’t-tevâbi‘ ve’l-levâhık ve yine karye-i mezbûrede bağlar dâhilinde Serdâr Bağı kurbunda vâki‘ ma‘lûmü’l-hudûd tahmînen bir buçuk dönüm bir kıt‘a ve yine kilise kurbunda vâki‘ iki kıt‘a ve yine yol kurbunda müşterî-i mezbûrun bağına muttasıl bir kıt‘a ve yine Langa demekle ma‘rûf mahalde bir kıt‘a ki cem‘an beş kıt‘a mülk bağlarımı dahi bi safkatin vâhidetin mezbûr Yuvan’a altmış kıt‘a esedî guruşa tarafeynden îcâb ve kabûlü [hâvî] bey‘-i bâtt-ı sahîh-i şer‘î ile bey‘ ve teslîm, ol dahi minvâl-i muharrer üzre iştirâ ve kabûl eyledikden sonra semeni olan mezbûrü’n-na‘t altmış guruşu müşterî-i mezbûr Yuvan’a zimmetimde lâzımü’l-edâ deynim olan altmış kıt‘a esedî guruşa takās eylediğimde ol dahi mukāssa ve kabûl edip menzil-i mahdûd-ı mezkûr ve mârrü’z-zikr beş kıt‘a bağları mahallinde zabt ve tasarrufa mesfûru taslît eyledim dedikde kayd şud. Fî 3 min Zilhicce sene [10]81. Şuhûdü’l-hâl: Hüseyin Çelebi Serbölük, Mehmed Çelebi b. Mahmud, Yorgi v. Niko, Mento v. Hıristo, Yuvan v. Niko.