Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 176 Hüküm no: 214 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. 1081 senesine mahsusen Haslar kazası dahilinden alınmakta olan kürekçi avârız bedellerinin defter mucebince tahsili Akzâ kuzâti’l-müslimîn, evlâ vülâti’l-muvahhidîn, ma‘denü’l-fazlı ve’l-yakīn vârisü ulûmi’l-enbiyâi ve’l-mürselîn hüccetü’l-hakkı ale’l-halkı ecma‘în el-muhtâs bi mezîdi inâyeti’l-meliki’l-mu‘în mevlânâ Haslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki inşâallâhu te‘âlâ evvel-i bahâr-ı huceste-âsârda deryâ yüzüne çıkacak donanma-yı hümâyûnum kadırgaları için ziyâde mühimmât tedâriki lâzım gelmekle kazâ-i mezbûrda vâki‘ kürekçi hânesi olan yüz yirmi avârız hânelerinin bin seksen senesine mahsûb olmak üzre kürekçi bedeli avârızları tersâne-i âmirem mühimmâtı için ta‘yîn olunup hazîne-i âmiremden mühürlü ve nişânlı mevkūfât defteri sûreti verilmekle mûcebince her bir hânesinden dörder yüz yirmi dokuzar akçe kürekçi bedeli avârızları vakt ü zamânıyla cem‘ ve tahsîl ve tersâne-i âmirem mühimmâtı için teslîm-i tersâne ettirilmek fermânım olmuşdur, buyurdum ki hükm-i şerîfimle vardıkda bu bâbda sâdır olan emrim üzre amel edip dahi te’hîr ve tevakkuf eylemeyip târih-i mezbûra mahsûb olmak üzre ol mikdâr avârız hânelerinin her bir hânesinden dörder yüz yirmi dokuzar akçe kürekçi avârızları irsâl olunan mühürlü ve nişânlı mevkūfât defteri sûreti mûcebince cem‘ ve tahsîl ve vakt ü zamânıyla teslîm-i tersâne edip ve teslîm olunduğuna tersâne emîninden temessük aldırıp ol temessükü mevkūfât defterine kayd ettiresin ve bundan mâ‘adâ tersâne-i âmirem harcı için on beşer akçe cem‘ eden mübâşirin cihet-i ma‘îşeti için onar akçe ta‘yîn olunmuşdur, ziyâde bir akçe alınmaya ve aldırmayasız ve verilen riyâl ve esedî guruşa hazîne-i âmirem alındığı üzre sağ akçe hesâbınca verdirip ziyân ve noksan verdirmiyesin ve akçe verildikde hâlisü’l-ayâr akçe verdirip züyûf ve kızıl ve kırık akçe aldırmayasın kendi defterini ve makbûzâtını ve hilâf-ı emr ve defter, zulm ve ta‘addîden be gāyet ihtirâz eyleyesin şöyle bilesin, alâmet-i şerîfe i‘timâd kılasız. Tahrîren fi’l-yevmi’l-âşir [min] şehri Ramazân sene ihdâ ve semânîn ve elf. Be makām-ı Edirne. Defter-i hânehâ-i avârız, kazâ-yı Haslar nâm-ı diğer Ebâ Eyyûb el-Ensârî sene Ramazân [10]81 Deyn-i Apostol 120 hâne, her hânenin avârız bedeli 429 akçe [cem‘an] 51.480 akçe. Tahrîren fî 9 Ramazân sene [10]81. el-Fakîr Mustafa