Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 188 Hüküm no: 226 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çorlu, Ereğli, Terkos ve Midye halkının yeni emr-i şerîf talepleri Mefâhirü’l-kuzât ve’l-hükkâm, me‘âdinü’l-fezâyil ve’l-kelâm Çorlu ve Ere[ğli] ve Terkos ve Midye kadıları -zîde fazluhum- tevkī‘-i refî‘-i hümâyûn vâsıl olıcak ma‘lûm ola ki Çorlu menzilcisi re‘âyâları hâlâ mahrûse-i Edirne’de[n] Dersaâdet’ime arzuhâl sunup mezbûrların tahammülleri olmamağla fermân-ı şerîf ile Çorlu kazâsında menzilci olmayan karyeler Haslar kazâsına tâbi‘ Ereğli ve Terkos ve Midye nâhiyeleri hâlimize merhameten yüz bin akçe imdâd eyleyeler deyû mukaddemâ yedimize emr-i şerîf-i âlîşân verilmiş idi, hâlâ ol emr-i şerîfin tecdîdin ricâ ederiz deyû bildirip inâyet ricâ eyledikleri ecilden Hazîne-i Âmiremde mahfûz olan mevkūfât defterlerine nazar olundukda kasaba-i nefs-i Çorlu ve mîrîden yirmi bin akçe, menzil çekmeyen Çorlu kazâsına tâbi‘ karyelerde yirmi bin akçe ve menzilcisinden gayri Ereğli nâhiyesinden yirmi bin akçe ve Terkos nâhiyesinden yirmi bin akçe ve Midye nâhiyesinden yirmi bin akçe ki cem‘an bir yük akçe olur menzil hizmetine me’mûr olan menzilci karyelerinin ba‘zıları perîşan olmağla iktidârları olmadığını bildirip inâyet ricâ eylediklerinde sefer-i âhar oluncaya değin imdâd eyleyeler deyû yedimde emr-i şerîf verildiği mastûr ve mukayyed[dir], imdi bi’t-terâzi cenâb-ı hilâfet me’âbım Edirne taht-ı rikâbında karâr buyurdukça kemâ fi’l-evvel zikr olunan yerlerden yüz bin akçe tahsîl olunup menzil için imdâd eyleyeler deyû fermânım olmuşdur buyurdum ki hükm-i şerîfim [vardıkda] Dergâh-ı mu‘allâm çavuşlarından -kıdvetü’l-emâsil ve’l-akrân- Ali Çavuş -zîde kadruhû- vardıkda bu bâbda sâdır olan emrim üzre amel edip dahi cenâb-ı hilâfet me’âbım mahrûse-i Edirne’den karâr buyurup kemâ fi’l-evvel zikr olunan nâhiyelerden yüz bin akçe tahsîl ve menzil-i mezbûre imdâd için teslîm ed[ip] hilâf-ı emr-i defter kimesneye zulüm ve ta‘addî ve nizâ‘ ettirmeyip şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâdis ve’l-ışrîn [min] şehri Rebî‘ulevvel sene [10]81. Be makām-ı Edirne Vasale ileynâ Şa‘bân fî 15.