Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 67 Hüküm no: 6 Orijinal metin no: [2b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Maksud’un vasîsi olduğu Mehmed namına miras hissesi iddiasının reddi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Câmi‘-i Kebîr mahallesi sâkinlerinden iken bundan akdem fevt olan Üveys b. Mehmed’in verâseti zevce-i metrûkesi Meryem bt. Mehmed ile sulbî sagīr oğlu Mehmed’e münhasıra olduğu şer‘an mütehakkik oldukdan sonra sagīr-i mezbûrun kıbel-i şer‘den mansûbe vasîsi Sâliha bt. Maksud nâm hâtun meclis-i şer‘-i şerîf-i hatîr-i lâzımü’t-tevkīrde muhallefât-ı müteveffâ-yı mezbûra vâzı‘ü’l-yed olan işbu râfi‘atü’l-kitâb mezbûre Meryem muvâcehesinde bi’l-vesâye da‘vâ ve takrîr-i kelâm edip mezbûre Meryem tereke-i müteveffâ-yı mezbûrdan otuz esedî guruş ve bir guruş kıymetli bir müsta‘mel Yanbolu kebesi ve mezbûr elli akçe kıymetinde bir tencere kapağıyla ve iki yüz akçe kıymetli bir yemeni yorgan ma‘a çarşeb ve elli akçe kıymetli bir sahan ve on guruş kıymetli beş top bez ve otuz akçe kıymetli bir göbekli bakır tasın sekiz sehimde yedi sehmi vasîsi olduğum sagīre-i mezbûra âid olan yedi sehmi sagīr-i mezbûr için bana teslîmden imtinâ‘ eder suâl olunup eşyâ-i mezkûrede sagīr-i mezbûra âid olan yedi sehmi teslîme tenbîh olunmak matlûbumdur dedikde gıbbe’s-suâl ve akībe’l-inkâr ve talebi’l-beyyine ityân-ı beyyineden izhâr-ı acz edip istihlâf etmeğin fi’l-vâki‘ eşyâ-i mezkûreyi ve fi’l-cümle ism-i mâl ıtlâk olunur tereke-i müteveffâ-yı mezbûrdan bir şey ketm ve ihfâ etmediğine mezbûre Meryem’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle mezbûre Sâliha merkūme Meryem’e bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Ali Çavuş b. Cafer, Ahmed Çelebi b. Mehmed, Mehmed Çavuş b. Mustafa, Abdüsselâm Efendi b. Mustafa, es-Seyyid Ârif Çelebi b. Mustafa, Çukadâr Ahmed Beşe.