Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 336 Hüküm no: 383 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hatice bt. Abdullah’ın oğlu Mehmed b. İbrahim’e Ali Beşe b. Mustafa’nın vasî, amcası Mehmed b. Şaban’ın nâzır tayin edildiği Mahmiye-i İstanbul’da Sinan Paşa mahallesinde sâkine iken bundan akdem vefât eden Hatice bt. Abdullah nâm hâtunun sadrî oğlu Mehmed b. İbrahim nâm sagīrin vâlidesi müteveffât-ı mezbûreden intikāl eden emvâlini hıfz ve ahvâlini zabt için bir vasî nasb olunmak lâzım ve mühim olmağın sagīr-i mezbûrun üstâdı olup sarrâc tâifesinden olan işbu bâ‘isü’l-kitâb Ali Beşe b. Mustafa nâm kimesne umûr-ı vesâyet uhdesinden gelmeğe kādir ve müstakīm olduğunu zeyl-i rakīmde isimleri terkīm olunan müslimîn ihbârları ile lede’ş-şer‘i’l-mutahhar sâbit ve mukarrer olmağın mezbûr Ali Beşe sagīr-i mezbûra vasî nasb olundukda ol dahi vesâyet-i mezbûreyi kabûl ve hizmet-i lâzımesini edâya ta‘ahhüd eyledikden sonra vasiyy-i mezbûr Ali Beşe meclis-i mezbûrda tereke-i müteveffât-ı mezbûreye vâzı‘ü’l-yed olan sagīr-i mezbûrun üvey babası Ali b. Mehmed mahzarında ikrâr ve i‘tirâf edip tereke-i müteveffât-ı mezbûreden sagīr-i mezbûrun hisse-i irsiyye-i şer‘iyyesine isâbet eden bin yüz yirmi akçeyi mezbûr Ali yedinden vesâyetim hasebiyle alıp kabz eyledim dedikde gıbbe’t-tasdîki’ş-şer‘î sagīr-i mezbûrun ammi Mehmed b. Şaban nâm kimesne vasiyy-i mezbûr üzerine hasbî nâzır nasb ve ta‘yîn olundukda ol dahi nezâret-i mezbûreyi kabûl ve hizmet-i lâzımesini edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min Recebi’l-ferd li sene seb‘a ve seb‘în ve elf. Şuhûdü’l-hâl: Mahmud b. Sefer, Ali Beşe b. Mustafa, Hasan Çelebi b. Musa, Mehmed Bey b. Mustafa, Ali Çelebi b. Mustafa, el-Hâc Mustafa b. Ali, Mehmed Çelebi b. Ömer.