Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 337 Hüküm no: 384 Orijinal metin no: [53a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in, Mehmed Beşe b. Mustafa’dan câriye bahasından alacaklı olduğu Esirci tâifesinden bâ‘isü’l-kitâb Ali Beşe b. Mehmed nâm kimesne meclis-i şer‘-i şerîfde İstanbul’da Mirahor mahallesinde sâkin Mehmed Beşe b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan dört ay mukaddem rıkkına mu‘terife orta boylu, açık kaşlı, elâ gözlü Rûsiyy[et]ü’l-asl Kalender bt. Abdullah nâm câriye-i memlûkemi merkūm Mehmed Beşe’ye yüz otuz esedî guruşa bey‘ ve teslîm ol dahi vech-i muharrer üzre iştirâ ve tesellüm etmişidi hâlâ semeni olan meblağ-ı merkūm yüz otuz esedî guruşu merkūm Mehmed Beşe yedinden taleb ederim suâl olunsun dedikde gıbbe’s-suâl mezkûr Mehmed Beşe cevâbında fi’l-vâki‘ târih-i merkūmda müdde‘î-i mezbûr Ali Beşe’den mevsûfe-i mezkûre Kalender’i vech-i meşrûh üzre yüz otuz kıt‘a esedî guruşa iştirâ ve tesellüm edip semeni olan meblağ-ı mezkûr müdde‘î-i merkūm Ali Beşe’ye zimmetimde lâzımü’l-edâ ve vâcibü’l-kazâ deynimdir deyû bi tav‘ihî ikrâr ve i‘tirâf etmeğin mûcebince meblağ-ı mezbûr yüz otuz kıt‘a esedî guruşa müdde‘î-i mezkûr Ali Beşe’ye edâ ve teslîme merkūm Mehmed Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Efendi b. Nurullah el-Müezzin, Mehmed Çelebi b. Abdullah Kethüdâ-yı muhzırân, Ali Çelebi b. Mehmed ve gayruhüm.