Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 338 Hüküm no: 386 Orijinal metin no: [53a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tezkireci Mehmed Efendi b. el-Hâc Ahmed’den vârislerince satılan arsası vakfa ait ev hisseleri konusunda vekil Hasan Efendi’nin vekâletinin geçerli olduğunun tespiti Dârü’l-hilâfeti’l-aliyye Kostantıniyye el-mahmiyye mahallâtından Karagümrük kurbunda Ali Paşa-yı Atîk mahallesi sâkinlerinden iken bundan akdem vefât eden Tezkireci Mehmed Efendi b. el-Hâc Ahmed’in verâseti ümm-i veledi Şivekâr bt. Abdullah nâm hâtundan mütevellid sulbî oğlu Ahmed nâm sagīre münhasır olup ba‘dehû sagīr-i mezbûr dahi fevt olup verâseti vâlidesi mezbûre Şivekâr ile li ebeveyn ammileri Mahmud Efendi ve Ali Halîfe’ye münhasıra ve tashîh-i mes’eleleri alâ tarîki’l-münâsahati’ş-şer‘iyye üç sehimden olup sihâm-ı mezbûrenin bir sehmi merkūme Şivekâr Hâtun’a ve bir sehmi merkūmân Mahmud Efendi ve Ali Halîfe’ye intikāl eylediği şer‘an mütehakkik oldukdan sonra mezbûrân Mahmud Efendi ve Ali Halîfe taraflarından husûs-ı âti’l-beyâna iddi‘â-i vekâlet eden fahrü’l-müderrisîni’l-kirâm Hasan Efendi b. Hüseyin meclis-i şer‘-i şerîf-i Ahmedî ve mahfil-i dîn-i münîf-i Muhammedî’de fahrü’l-müderrisîni’l-kirâm Mehmed Efendi b. Hamza tarafından husûs-ı câ’i’l-beyâna nehc-i şer‘î ve tarîk-i mu‘teber-i mer‘î üzre sâbitü’l-vekâle vekîl olan umdetü’l-müderrisîni’l-kirâm zübdetü’l-muhakkikīni’l-fihâm Tâli Mehmed Efendi mahzarında da‘vâ ve takrîr-i kelâm edip arsası merkūme Âişe Hâtun nâm sâhibetü’l-hayrın süknâsı ulemâya meşrûta vakfı ve üzerinde olan ebniyesi müteveffâ-yı evvel-i mezbûrun mülkü olup mahalle-i mezbûrda vâki‘ bir tarafdan Mehmed Efendi nâm kimesne mülkü ve bir tarafdan Âişe nâm hâtun mülkü ve bir tarafdan Hasan Ağa vakfı ve bir tarafdan tarîk-i âm ile mahdûd dâhiliyyesinde ve hâriciyyesinde büyût-ı adîdeyi müştemil menzilin ebniye-i memlûkesinden vech-i muharrer üzre bi tarîki’l-münâsahati’ş-şer‘iyye sihâm-ı mezbûreden mezbûrân Mahmud Efendi ve Ali Halîfe’nin hisseleri olan bir sehm-i şâyi‘lerini müşârün-ileyh Tâli Mehmed Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bundan akdem yüz elli kıt‘a esedî guruşa bi’l-vekâle bey‘ ve kabz-ı semen edip ol dahi menzil-i mezkûrun ber mûceb-i şart-ı vâkıfe arsasına tevcîh-i hâkim ile mutasarrıf olan müvekkili mûmâ-ileyh Mehmed Efendi için iştirâ ve def‘-i semen etmiş idi hâlâ mebî‘-i mezbûru kabzdan imtinâ‘ eder suâl olunup kabz-ı mebî‘-i mezbûra müşârün-ileyh Mehmed Tâli Efendi’ye tenbîh olunmak bi’l-vekâle matlûbumdur dedikde gıbbe’s-suâl mûmâ-ileyh Tâli Mehmed Efendi cevâbında fi’l-hakīka kaziyye şerh ve beyân olunduğu üzre olmuşidi lâkin ben havf ederim ki mebî‘-i mezbûr kabzımdan sonra mezbûrân Mahmud Efendi ve Ali Halîfe mûmâ-ileyh Hasan Efendi’yi husûs-ı mezkûra tevkîllerini inkâr edip mebî‘-i mezkûr dahi hâlik olup menzil-i mezkûrdan hisselerinin kıymetini benden veya müvekkilimden da‘vâ eyleyip veya müvekkilim [53b] dahi isbât edememek ile benden veya müvekkilimden tazmîn edip zarar terettüb eyleye müşârün-ileyh Hasan Efendi vekâletini isbât eylesin dedikde mûmâ-ileyh Hasan Efendi’den vech-i muharrer üzre vekâletine beyyine taleb olundukda mahmiye-i mezbûrede Beyceğiz mahallesi sâkinlerinden Receb Efendi b. Musli ve çukadâr Ali Çelebi b. Mehmed nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka merkūmân Mahmud Efendi ve Ali Halîfe menzil-i mezbûrdan vech-i muharrer üzre üç sehimden hisseleri olan birer sehm-i şâyi‘lerini bey‘ ve teslîm ve kabz-ı semen ve cemî‘ emirlerine müşârün-ileyh Hasan Efendi’yi bey‘-i mezbûrdan mukaddem bir husûsumuzda vekâlet-i mutlaka ile vekîl edip mûmâ-ileyh Hasan Efendi dahi kabûl ve merâsimini edâya ta‘ahhüd eylemiş idi biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eyledikde ba‘de’t-ta‘dîl ve’t-tezkiyye şehâdetleri makbûle olup mûcebince müşârün-ileyh Hasan Efendi’nin vech-i muharrer üzre vekâletine ba‘de’l-hükm mebî‘-i mezkûru kabza müşârün-ileyh Tâli Mehmed Efendi’ye tenbîh olunmağın mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâdis min Recebi’l-mürecceb li sene seb‘a ve seb‘în ve elf. Şuhûdü’l-hâl: El-Hâc Mehmed Efendi b. Mustafa, fahrü’l-müderrisîn Abdülkerim Efendi b. Abdüllatîf, Mehmed Efendi b. Musli eş-şehîr bi Lahumî?, İvaz Çelebi b. Mahmud, Mehmed Çelebi b. İbrahim, İbrahim Beşe b. Abdullah.