Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 337 Hüküm no: 385 Orijinal metin no: [53a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın, Mehmed Halife b. Mustafa’ya verdiği rüşveti geri aldığı Mahmiye-i İstanbul’da Akseki mahallesinde sâkin Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde Mehmed Halîfe b. Mustafa nâm kimesne mahzarında üzerine da‘vâ ve takrîr-i kelâm edip merkūm Mehmed Halîfe’ye târih-i kitâbdan iki ay mukaddem bi tarîki’r-rüşve on riyâlî guruş def‘ ve teslîm ol dahi yedimden ahz u kabz etmişidi, hâlâ meblağ-ı mezbûru merkūmdan taleb ederim suâl olunsun dedikde gıbbe’s-suâl merkūm Mehmed Halîfe cevâbında fi’l-vâki‘ müdde‘î-i merkūm Ahmed’den târih-i mezbûrda bi tarîki’r-rüşve on riyâlî guruşu ahz u kabz eyledim deyû bi tav‘ihî ikrâr ve i‘tirâf etmeğin mûcebince meblağ-ı mezbûru müdde‘î-i merkūma edâ ve teslîme merkūm Mehmed Halîfe’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Recebi’l-mürecceb li sene seb‘a ve seb‘în ve elf. Şuhûdü’l-hâl: Hasan Çelebi b. Ahmed, Resul b. Rıdvan, Ali b. Mahmud, Mehmed b. Ramazan ve gayruhüm mine’l-huzzâr.