Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 340 Hüküm no: 388 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe’nin, Manol v. Nikola’da koyun bedelinden alacağı olduğunu ispat edemediği Mahmiye-i İstanbul’da Hocapaşa mahallesi ahâlîsinden olup hâlâ sefer-i hümâyûnda olan Veli Beşe b. ( ) tarafından husûs-ı âti’l-beyâna vekîl olduğu Mehmed b. Hüseyin Kapudân ve Osman b. Hasan nâm kimesneler şehâdetleri ile sâbit olan Hüseyin Bey b. Ali nâm kimesne meclis-i şer‘de sürekçi tâifesinden bâ‘isü’s-sifr Manol v. Nikola nâm zimmî muvâcehesinde üzerine da‘vâ ve takrîr-i kelâm edip müvekkilim mûmâ-ileyh Veli Beşe bundan akdem mezbûr Manol’e bey‘ ve teslîm ol dahi iştirâ ve tesellüm ettiği beynlerinde ma‘lûm koyun bahâsından bâkī-i mezbûr Manol zimmetinde hakkı olan beş yüz elli riyâlî guruşu mezbûr Manol’den taleb ve ahz u kabza ve kendiye îsâle beni vekîl edip ve mezbûr Manol dahi cihet-i mezbûreden müvekkil-i mûmâ-ileyh[e] beş yüz elli riyâlî guruş deyni olduğunu ikrâr dahi etmeğin suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Manol koyun bahâsından bâkī müvekkil-i mezbûra beş yüz elli riyâlî guruş deyni olmayıp ikrâr dahi etmediğine yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebince müdde‘î-i mezbûr bilâ-beyyine mu‘ârazadan men‘ olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelâhir li sene seb‘a ve seb‘în ve elf. Şuhûdü’l-hâl: Mustafa Çavuş b. ( ) el-Mübâşir, Hüseyin Çavuş b. Abdullah, Mehmed Ağa b. Mustafa, Mehmed Ağa b. Abdullah, es-Seyyid Abdülfettâh Çelebi ve gayruhüm mine’l-huzzâr.