Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 340 Hüküm no: 389 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Ali’nin hırsızlık suçlamasını ispat edemediği Mahmiye-i İstanbul’da Sırmakeş mahallesi ahâlîsinden Ahmed Bey b. Ali nâm kimesne meclis-i şer‘-i şerîfde işbu ashâbü’s-sifr Nasrullah v. Ferecullah ve İşve v. Yakob ve Naser v. Mihna nâm zimmîler mahzarlarında üzerlerine da‘vâ ve takrîr-i kelâm edip mahmiye-i mezbûrede Bitpazarı sûkunda vâki‘ icâre ile tasarrufumda olan dükkânım mezbûrların dükkânlarına mülâsık olmağla mezbûrlar gece ile dükkânımın duvarını delip içinde mülküm olan eşyâmdan on guruş kıymetli bir sarı atlas ve beş guruş kıymetli bir yeşil kutnî kaftanlarımı ve üç yüz akçe kıymetli bir yeşil muhattem ve iki bin akçemi ve İlyas nâm kimesnenin yedimde rehni olan yirmi bir miskāl bileziğini ve Hacı Şaban nâm kimesnenin yedimde emâneti olan üç yüz akçe kıymetli on bir arşın keten bezini bi gayrı hakkın ahz u kabz etmişlerdir, suâl olunup mevcûd ise aynılarını bana teslîme müstehlek ise kıymet-i şer‘iyyelerini bana zâmin olmak üzre mezbûrûn Nasrullah ve İşve ve Naser’e tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip yemîn dahi vermemeğin mâ vaka‘a bi’t-taleb ketb olundu. Fi’l-yevmi’l-hâmis min Recebi’l-ferd li sene seb‘a ve seb‘în ve elf. Şuhûdü’l-hâl: Mustafa Çelebi b. Habib, Kenan Bey b. Abdullah, Mehmed Bey b. Hasan, Ahmed b. Mestanî? ve gayruhüm mine’l-huzzâr.